ஏரிக்கரையில் கண்ணீர் மல்க திரண்ட நூற்றுக்கணக்கான பெண்கள்….! “களிமண் கொடும்பாவியை கிராம வீதிகளில் இழுத்து சென்று…” தீர்வை தேடி மக்கள் செய்யும் வினோத சடங்கு…!!

விழுப்புரம் மாவட்டம் திண்டிவனம் அடுத்த மயிலம் மற்றும் அதன் சுற்றுவட்டாரக் கிராமங்களில் கடந்த சில மாதங்களாகப் போதிய மழை பொழியாததால் கடுமையான வறட்சி நிலவி வருகிறது. இதனால் நிலத்தடி நீர்மட்டம் முன்னெப்போதும் இல்லாத அளவிற்கு மிக மோசமாகச் சரிந்துள்ளதால், வாழ்வாதாரமாக விளங்கும் விவசாயப் பயிர்கள் அனைத்தும் காய்ந்து கருகி வருகின்றன.

பயிர்கள் மட்டுமன்றி, தங்களின் வீட்டு விலங்கினங்களான ஆடு, மாடு உள்ளிட்ட கால்நடைகளுக்குத் தேவையான தீவனமும், பொதுமக்களின் அன்றாடத் தாகத்தைத் தீர்க்கும் குடிநீரும் கிடைக்காமல் அப்பகுதி மக்கள் சொல்லொணாத் துயரத்திற்கு ஆளாகியுள்ளனர். இந்த வறட்சியின் கொடிய பிடியில் இருந்து தங்களது பூர்வீக நிலத்தை மீட்டெடுத்து மீண்டும் செழிக்க வைக்க வேண்டி, மயிலம் பகுதி மக்கள் அனைவரும் ஒன்றிணைந்து இயற்கையை நோக்கிய ஒரு விநோதமான கூட்டு வழிபாட்டு முறையைக் கையில் எடுத்துள்ளனர்.

இதன்படி வறட்சியின் அடையாளமாகக் கருதப்படும் ‘கொடும்பாவி’ என்ற பிரம்மாண்ட உருவ பொம்மயைக் களிமண்ணால் வடிவமைத்து, பாரம்பரிய பறை இசை முழங்க கிராமத்தின் முக்கிய வீதிகள் வழியாக ஊர்வலமாக இழுத்துச் சென்றனர். இந்த ஊர்வலம் இறுதியாக அப்பகுதியில் உள்ள ஏரிக்கரை முகப்பை அடைந்ததும், அங்குத் திரண்ட ஏராளமான கிராமத்துப் பெண்கள் தங்களின் வாழ்வாதார இழப்பை எண்ணிக் கைகளைத் தட்டி கண்ணீர் மல்க ஒப்பாரி வைத்து உருகிப் பாடினர்.

கடந்த ஏழு ஆண்டுகளுக்கு முன்பு இதேபோன்ற கடுமையான நீர் தட்டுப்பாடு நிலவிய போது, இதேபோன்று கொடும்பாவியை உருவாக்கி எரித்து வழிபட்ட அடுத்த சில நாட்களிலேயே பலத்த மழை பெய்து வறட்சி நீங்கியதாக அக்கிராமத்துப் பெரியவர்கள் தங்களது அசைக்க முடியாத நம்பிக்கையைத் தெரிவித்தனர். கருகும் பயிர்களும் வாடும் கால்நடைகளும் உயிர் பெற வேண்டும் என்ற நோக்கில் கிராம மக்கள் நடத்திய இந்த உருக்கமான வேண்டுதல் சடங்கு காண்போரின் நெஞ்சை உலுக்கும் வகையில் அமைந்துள்ளது.