“ஸ்டாலின் மீண்டும் போட்டியா? உதயநிதி சொன்ன அந்த ஒரு ‘நோ’… பின்னணியில் இருக்கும் ரகசியம்… உதயநிதி முடிவால் அதிர்ச்சியில் சீனியர்கள்…!

தமிழ்நாடு சட்டமன்றத் தேர்தல் முடிவுகளுக்குப் பிறகு, மாநில அரசியல் களம் நாளுக்கு நாள் பரபரப்பான திருப்பங்களைச் சந்தித்து வருகிறது. குறிப்பாக, திருச்சி கிழக்கு தொகுதி உள்ளிட்ட காலியாக உள்ள 6 சட்டமன்றத் தொகுதிகளுக்கு விரைவில் இடைத்தேர்தல் நடைபெற உள்ளது. இந்த இடைத்தேர்தலானது, தற்போதைய ஆளுங்கட்சியான தமிழக வெற்றிக் கழகத்திற்கும் (தவெக), எதிர்க்கட்சியான திமுகவிற்கும் இடையிலான நேரடிப் போட்டியாகவே பார்க்கப்படுகிறது. இந்நிலையில், கடந்த பொதுத்தேர்தலில் கொளத்தூர் தொகுதியில் தோல்வியடைந்த திமுக தலைவர் மு.க.ஸ்டாலின், இந்த திருச்சி கிழக்கு இடைத்தேர்தலில் போட்டியிடப் போகிறார் என்ற தகவல்கள் அரசியல் வட்டாரத்தில் பலத்த விவாதத்தை ஏற்படுத்தியுள்னன.

முன்னாள் முதலமைச்சர் மு.க.ஸ்டாலின் மீண்டும் சட்டமன்றத்திற்குள் நுழைய வேண்டும் என்பதில் திமுகவின் மூத்த நிர்வாகிகள் மற்றும் சீனியர் தலைவர்கள் தீவிரமாக உள்ளனர். அவர் திருச்சி கிழக்கு தொகுதியில் போட்டியிட வேண்டும் என்று அவர்கள் தொடர்ந்து தலைமைக்கு அழுத்தம் கொடுத்து வருகின்றனர். ஆனால், கட்சியின் எதிர்காலத்தைக் கருத்தில்கொண்டு, ஸ்டாலின் மீண்டும் இடைத்தேர்தலில் போட்டியிடுவதை திமுகவின் முக்கிய முகமும், எதிர்க்கட்சித் தலைவருமான உதயநிதி ஸ்டாலின் முற்றிலும் விரும்பவில்லை என்று கூறப்படுகிறது. இந்த விவகாரத்தில் உதயநிதிக்கும், கட்சியின் மூத்த நிர்வாகிகளுக்கும் இடையே தற்போது கடுமையான கருத்து வேறுபாடு நிலவி வருகிறது.

உதயநிதியின் இந்தத் தயக்கத்திற்குப் பின்னால் சில முக்கிய அரசியல் கணக்குகளும், பயங்களும் இருப்பதாகத் தெரிகிறது. பொதுவாக இடைத்தேர்தல்களில் ஆளுங்கட்சியே வெற்றி பெறும் என்ற சூழல் நிலவும் நிலையில், புதிய ஆளுங்கட்சியான தவெக மற்றும் விஜய் மீதான எதிர்பார்ப்பு மக்களிடம் இன்னும் குறையவில்லை. இத்தகைய சூழலில், மு.க.ஸ்டாலின் மீண்டும் போட்டியிட்டு ஒருவேளை தோல்வியடைந்தால், அது திமுகவிற்கு மீள முடியாத மிகப்பெரிய பின்னடைவை ஏற்படுத்தும் என்றும், அவரது அரசியல் எதிர்காலத்திற்கே அது முற்றுப்புள்ளியாக மாறிவிடும் என்றும் கட்சியின் ஒரு தரப்பினர் அஞ்சுகின்றனர். மேலும், அனுதாப அலையில் வெற்றி பெற்றாலும் அது விமர்சனத்திற்குள்ளாகும் என்பதும் அவர்களின் கருத்தாக உள்ளது.

மறுபுறம், திமுக சந்தித்த இந்தத் தோல்விக்கு மூத்த நிர்வாகிகளின் அலட்சியமும், அவர்கள் மீதான மக்கள் அதிருப்தியுமே காரணம் என்று உதயநிதி கருதுவதாகத் தெரிகிறது. மு.க.ஸ்டாலினை மீண்டும் முன்னிறுத்தி, அவரது பெயரால் கட்சியில் தங்களது ஆதிக்கத்தைத் தக்கவைத்துக் கொள்ளவே சீனியர்கள் முயல்கிறார்கள் என்பது இளந்தலைமுறையினரின் எண்ணமாக உள்ளது. இதனால் கட்சியின் எதிர்கால நலன் கருதி, அத்தகைய மூத்த நிர்வாகிகளை ஓரங்கட்ட உதயநிதி திட்டமிட்டுள்ளதாகவும் கூறப்படுகிறது. எது எப்படியாயினும், இன்னும் சில நாட்களில் வெளியாகவுள்ள திமுக வேட்பாளர் பட்டியலில் மு.க.ஸ்டாலின் பெயர் இடம்பெறுமா இல்லையா என்பதில் தான் ஒட்டுமொத்த தமிழக அரசியலின் பார்வையும் பதிந்துள்ளது.