அட பாவி.. சாப்பாட்டு விற்கும் தட்டில்.. இப்படியா காலை வைப்பது.. ரயில் சமோசாவில் இப்படியொரு அசுத்தமா..? நடவடிக்கை எடுத்த ரயில்வே நிர்வாகம்…!!

ஓடும் இரயில் ஒன்றில் சமோசா விற்கும் நபர் ஒருவர், இரயில் வாசலின் அருகே தரையில் அமர்ந்து கொண்டு, பயணிகளுக்கு விற்க வேண்டிய சமோசாக்கள் அடங்கிய தட்டின் மீது தனது கால்களை வைத்தபடி மிகவும் அலட்சியமாகத் தொலைபேசியில் பேசிக்கொண்டிருக்கும் அதிர்ச்சியூட்டும் வீடியோ சமூக வலைத்தளங்களில் வெளியாகி வேகமாகப் பரவி வருகிறது. இந்த வீடியோவை எக்ஸ் (X) தளத்தில் பகிர்ந்துள்ள நெட்டிசன்கள், இரயிலில் வழங்கப்படும் உணவுகளின் தரம் மற்றும் பயணிகளின் ஆரோக்கியத்துடன் விளையாடும் இத்தகைய செயல்களைக் கண்டு தங்களது கடும் கண்டனங்களையும் கோபத்தையும் வெளிப்படுத்தி வருகின்றனர்.

பயணக் கட்டணத்தை முழுமையாகச் செலுத்தும் தங்களுக்கு ஏன் இத்தகைய சுகாதாரமற்ற உணவுகள் வழங்கப்பட வேண்டும் என்று கேள்வி எழுப்பியுள்ள பொதுமக்கள், சம்பந்தப்பட்ட நபர் மீது இரயில்வே நிர்வாகம் உடனடியாக கடுமையான நடவடிக்கை எடுக்க வேண்டும் என்று வலியுறுத்தினர். இந்த வீடியோ சமூக வலைத்தளங்களில் பெரும் சர்ச்சையை ஏற்படுத்தியதை அடுத்து, இந்திய இரயில்வே உணவு மற்றும் சுற்றுலா கழகம் மற்றும் இரயில்வே நிர்வாகம் உடனடியாக இந்த விவகாரம் குறித்து தீவிர விசாரணையைத் தொடங்கியது.

இந்த விசாரணையின் முடிவில், வீடியோவில் இருக்கும் நபர் இரயில்வேயின் அதிகாரப்பூர்வ ஊழியரோ அல்லது அங்கீகரிக்கப்பட்ட உணவு விற்பனையாளரோ அல்ல என்றும், அவர் இரயிலில் சட்டவிரோதமாக நுழைந்து உணவுப் பொருட்களை விற்றவர் என்றும் இரயில்வே நிர்வாகம் விளக்கம் அளித்துள்ளது. மேலும், வருங்காலத்தில் இதுபோன்ற சம்பவங்கள் நடக்காமல் தடுக்க, இரயிலில் இருக்கும் அங்கீகரிக்கப்பட்ட உணவு வழங்கும் ஊழியர்களுக்கு எச்சரிக்கை விடுக்கப்பட்டுள்ளதாகவும், சந்தேகத்திற்கிடமான நபர்கள் யாராவது உணவுகளை விற்றால் உடனடியாக இரயில்வே கட்டுப்பாட்டு அறைக்குத் தகவல் தெரிவிக்குமாறு உத்தரவிடப்பட்டுள்ளதாகவும் அதிகாரிகள் தெரிவித்துள்ளனர்.