ஒரு பிள்ளையின் ஆகச்சிறந்த சாதனை..! பெற்றோரை அலுவலகத்திற்கு அழைத்துச் சென்று நெகிழ வைத்த மகள்… நெட்டிசன்களை உருகவைத்த வீடியோ…!!

ஐதராபாத்தில் உள்ள அமேசான் நிறுவனத்தில் பணிபுரியும் ஆகிருதி சின்ஹா என்ற பெண், தனது பெற்றோரைத் தான் வேலை செய்யும் அலுவலகத்திற்கு அழைத்துச் சென்ற நெகிழ்ச்சியான வீடியோ சமூக வலைதளங்களில் வைரலாகி பலரது இதயங்களை வென்று வருகிறது. முன்பு ஒரு காலத்தில் வீடியோ காலில் மட்டுமே தனது பெற்றோருக்குத் தான் வேலை செய்யும் அலுவலகத்தையும், மேஜையையும் காட்டி வந்த ஆகிருதி, தற்போது அவர்களை நேரில் அழைத்துச் சென்று காட்டியுள்ளார்.

தன் பெற்றோர் ஐதராபாத் வந்திருந்த போது, அவர்களை நகரின் பல சுற்றுலா இடங்களுக்கு ஆகிருதி அழைத்துச் சென்றுள்ளார். ஆனால், அவர்களுக்கு மற்ற இடங்களை விட தங்கள் மகள் இரவும் பகலும் உழைக்கும் அலுவலகத்தைப் பார்ப்பதில்தான் அதிக ஆர்வம் இருந்தது. ஆகிருதி அவர்களை அலுவலகத்திற்குள் அழைத்துச் சென்று, தான் அமர்ந்து வேலை செய்யும் இடத்தை காட்டியபோது, அவரது பெற்றோரின் முகம் பெருமிதத்தால் மலர்ந்தது. இந்த நெகிழ்ச்சியான தருணத்தில் ஆகிருதி உணர்ச்சிவசப்பட்டு கண்ணீர் விட்டுள்ளார்.

https://www.instagram.com/reel/DYwzTpIuZwS/?utm_source=ig_web_copy_link

இந்த அழகான மற்றும் உணர்வுபூர்வமான தருணத்தை ஆகிருதி தனது இன்ஸ்டாகிராம் பக்கத்தில் பகிர்ந்துள்ளார். இந்த வீடியோவை பார்த்த நெட்டிசன்கள், “ஒரு பெற்றோருக்கு இதைவிட பெரிய மகிழ்ச்சியும், ஒரு பிள்ளைக்கு இதைவிட பெரிய சாதனையும் இருக்க முடியாது” என்று நெகிழ்ந்து பாராட்டி வருகின்றனர். மேலும், வெளியூரில் தங்கி வேலை செய்து தங்கள் குடும்பத்திற்குப் பெருமை சேர்க்கப் போராடும் ஒவ்வொரு பிள்ளையின் கதையும் இதுதான் எனப் பலரும் தங்களது வாழ்த்துகளைத் தெரிவித்து வருகின்றனர்.