டெல்லியில் இறங்கி அடித்த முதலமைச்சர் விஜய்.. பிரதமர் மோடியிடம் கொடுத்த ‘மெகா டிமாண்ட்’ லிஸ்ட் இதோ.. அதிர்ந்த அரசியல் களம்..!!

டெல்லியில் பிரதமர் நரேந்திர மோடி தலைமையில் நடைபெற்ற நிதி ஆயோக் கூட்டத்தில் தமிழ்நாடு முதலமைச்சர் ச. ஜோசப் விஜய் பங்கேற்று, மாநில வளர்ச்சித் திட்டங்கள் மற்றும் நிதி உரிமைகள் குறித்துப் பேசினார். குறிப்பாக, தமிழ்நாட்டின் போக்குவரத்து உள்கட்டமைப்பை மேம்படுத்தும் வகையில், ஜி.எஸ்.டி. சாலையின் செங்கல்பட்டு – திருச்சி பகுதி, திருச்சி – கரூர் பகுதி மற்றும் கரூர் – கோயம்புத்தூர் பகுதியை ஆறு வழிச்சாலைகளாக மேம்படுத்த ஒப்புதல் அளிக்குமாறு மத்திய அரசிடம் கோரினார். மேலும், மாதவரம் – சோழவரம் இடையே உயர்த்தப்பட்ட வழித்தடம் அமைக்கவும், சென்னை முதல் கன்னியாகுமரி வரை அதிவேக ரயில் வழித்தடம் அமைக்கவும் ரயில்வே மற்றும் நெடுஞ்சாலைத் துறை அமைச்சகங்களுக்கு உத்தரவிடுமாறு வலியுறுத்தினார்.

மாநிலத்தின் டிஜிட்டல் மற்றும் குடிநீர் கட்டமைப்பு குறித்துப் பேசிய முதலமைச்சர் விஜய், தமிழ்நாட்டில் ‘பாரத்நெட்’ இரண்டாம் கட்டத் திட்டம் 97% நிறைவடைந்துள்ளதைச் சுட்டிக்காட்டி, அனைத்து கிராமப் பஞ்சாயத்துகளுக்கும் தடையற்ற இணைய இணைப்பை உறுதி செய்ய மத்திய அரசு ஆதரவளிக்க வேண்டும் எனக் கேட்டுக்கொண்டார். தொடர்ந்து, ரூ. 2,283.40 கோடி மதிப்பீட்டிலான ஒகேனக்கல் மூன்றாம் கட்டக் கூட்டுக்குடிநீர் திட்டத்திற்கு ஒன்றிய அரசின் உறுதியளிக்கப்பட்ட நிதி உதவியை விரைந்து வழங்க வேண்டும் என்றும் கோரிக்கை விடுத்தார். நிதிப் பொறுப்புணர்வு, சமூக முன்னேற்றம் மற்றும் மக்கள் தொகை கட்டுப்பாடு ஆகியவற்றில் சிறப்பாகச் செயல்படும் மாநிலங்கள் உரிய அங்கீகாரத்தைப் பெற வேண்டுமே தவிர, எந்த வகையிலும் பாதிக்கப்படக் கூடாது என்றும் அவர் சுட்டிக்காட்டினார்.

கல்வி மற்றும் கலாச்சார உரிமைகளுக்கு முக்கியத்துவம் அளித்துப் பேசிய முதலமைச்சர் விஜய், ‘ஒருங்கிணைந்த கல்வி’ திட்டத்தின் கீழ் தமிழ்நாட்டிற்கு வர வேண்டிய ரூ. 3,284 கோடி நிலுவை நிதியை உடனடியாக விடுவிக்க வேண்டும் என்றார். புதிய கல்விக் கொள்கையையோ அல்லது மும்மொழிக் கொள்கையையோ திணிக்காமல், எவ்வித நிபந்தனையுமின்றி இந்த நிதியை வழங்க வேண்டும் என அவர் திட்டவட்டமாக வலியுறுத்தினார். இறுதியாக, நவீன இந்தியாவின் மதச்சார்பற்ற விழுமியங்களின் அடையாளமாக விளங்கும் தொன்மையான திருக்குறளை ‘தேசிய இலக்கியமாக’ அறிவிக்க வேண்டும் என்ற முக்கிய கோரிக்கையை முன்வைத்த முதலமைச்சர் விஜய், “மாநிலங்கள் வலுப்பெறும்போதுதான் இந்தியாவும் வலிமை பெறுகிறது” எனத் தனது உரையை நிறைவு செய்தார்.