“10 பேருடன் அந்த ஒரு பானை”…. சிறுநீர் கழிக்கணும்… துர்நாற்றம் வீசும்…. சிறையில் நடந்த கொடூரம்…. விஜய் வீடியோவுக்கு ஸ்டாலின் அளித்த அதிரடி பதில்..!

முன்னாள் முதலமைச்சர் மு.க.ஸ்டாலின் மிசா சட்டத்தின் கீழ் கைது செய்யப்பட்டு சிறையில் அனுபவித்த கொடுமைகள் மற்றும் அண்மையில் சட்டப்பேரவையில் எழுந்த சர்ச்சைகள் குறித்து உருக்கமான விளக்கம் அளித்துள்ளார். அண்மையில் நடைபெற்ற தமிழகச் சட்டமன்றக் கூட்டத்தொடரின் போது, முதல்வர் விஜய், ஸ்டாலினின் சிறை அனுபவம் மற்றும் அவரது தாடை உடைந்தது குறித்துச் செய்த சில செய்கைகள் அரசியல் வட்டாரத்தில் பெரும் விவாதத்தைக் கிளப்பியது. இதற்குத் திமுகவினரும், மார்க்சிஸ்ட் கம்யூனிஸ்ட் உள்ளிட்ட கூட்டணிக் கட்சிகளும் கடும் கண்டனம் தெரிவித்த நிலையில், ஸ்டாலின் இதுதொடர்பாகக் காணொளி ஒன்றைப் வெளியிட்டுத் தனது தரப்பு உண்மைகளைத் தெளிவுபடுத்தியுள்ளார்.

1976-ஆம் ஆண்டு அவசரநிலைக் காலத்தில், மிசா சட்டத்தை எதிர்த்துக் கருணாநிதி குரல் கொடுத்ததைத் தொடர்ந்து அப்போதைய மத்திய அரசு திமுக ஆட்சியைக் கலைத்தது. ஆட்சிக் கலைப்பு நடந்த கையோடு தன்னைக் கைது செய்யக் கோபாலபுரம் வீட்டிற்குப் காவல்துறை வந்ததாகவும், தான் பிரசாரத்தில் இருந்ததால் மறுநாள் கலைஞர் மூலமாகவே காவல்துறையிடம் சென்று சரணடைந்ததாகவும் ஸ்டாலின் குறிப்பிட்டுள்ளார். சிறையில் தங்களை அடைத்த விதம் முதல் அங்கே அனுபவித்த சித்திரவதைகள் வரை அனைத்தையும் அவர் அதில் விவரித்துள்ளார்.

சிறை அனுபவங்களை நினைவு கூர்ந்த ஸ்டாலின், “தொழுநோயாளிகள் இருந்த இடத்தில், 10 பேரை ஒரு சிறு அறையில் அடைத்து வைத்தார்கள். அந்த அறையிலேயே சிறுநீர் கழிக்க வேண்டிய அவலநிலை இருந்தது. இரவில் தூங்க விடாமல் லத்தியால் அடிப்பதும், பூட்ஸ் கால்களால் மிதிப்பதும் வாடிக்கையாக இருந்தது. ஆயுள் தண்டனை கைதிகளைக் கொண்டு கொடூரமாகத் தாக்கியதில் நாடாளுமன்ற உறுப்பினர் சிட்டி பாபு சிறையிலேயே உயிரிழந்தார். அந்தத் தாக்குதலில் தான் எனது தாடை எலும்பு உடைந்தது; அதற்கான தழும்புகள் இன்றைக்கும் என் உடலில் இருக்கிறது” என வேதனையுடன் தெரிவித்துள்ளார்.

அரசியல் களத்தில் தன்னை யார் கொச்சைப்படுத்த முயன்றாலும் வரலாற்றை யாராலும் மாற்றிவிட முடியாது என்று குறிப்பிட்ட ஸ்டாலின், பொதுவாழ்க்கையிலும் தமிழர்களுக்காகப் போராடுபவர்களும் இதுபோன்ற அடக்குமுறைகளைக் கடந்துதான் வர வேண்டியுள்ளது என்றார். முன்னதாக, சட்டமன்றத்தில் காவல்துறை மானியக் கோரிக்கை மீதான விவாதத்தின் போது வெளிப்பட்ட தனது உடல்மொழி எதேச்சையாக நடந்ததே தவிர, யாரையும் உருவகேலி செய்யும் உள்நோக்கம் கொண்டதல்ல என்றும், தனிப்பட்ட முறையில் யார் மனதையும் புண்படுத்தும் நோக்கம் தமக்கு இல்லை என்றும் விஜய்யும் விளக்கம் அளித்துள்ளது குறிப்பிடத்தக்கது.