தமிழக அரசியலில் பரபரப்பு… சற்றுமுன் கட்சியில் இருந்து நீக்கம்… பதவிக்கு வந்த 2 வருடத்தில் கல்தா…!

தமிழக மகிளா காங்கிரஸ் தலைவியாகப் பதவி வகித்து வந்த ஹசீனா சையத், அந்தப் பதவியிலிருந்து அதிரடியாக நீக்கப்பட்டுள்ளார். இதற்கான உத்தரவை அகில இந்திய மகளிர் காங்கிரஸ் தலைவி அல்கா லம்பா பிறப்பித்துள்ளார். கடந்த 2024 ஆம் ஆண்டு ஏப்ரல் மாதம் மகளிர் காங்கிரஸ் தலைவியாகப் பொறுப்பேற்ற ஹசீனா சையத், அதற்கு முன்பாக மகிளா காங்கிரஸ் தேசிய செயலாளராகவும், செய்தி விவாதங்களில் கட்சியின் முக்கிய முகமாகவும் செயல்பட்டு வந்தார். பதவிக்கு வந்த குறுகிய காலத்திலேயே அவர் நீக்கப்பட்டிருப்பது அரசியல் வட்டாரத்தில் பெரும் விவாதத்தைக் கிளப்பியுள்ளது.

அவர் மீதான இந்த நடவடிக்கைக்கு “கட்சி விரோத நடவடிக்கைகள்” தான் முக்கிய காரணம் என்று கட்சித் தலைமை தரப்பில் தெரிவிக்கப்பட்டுள்ளது. கடந்த இரண்டு ஆண்டுகளாக இந்தப் பதவியில் இருந்த அவர், கட்சி விதிகளுக்கு மாறாகச் செயல்பட்டதாக எழுந்த புகார்களின் அடிப்படையில் இந்த முடிவு எடுக்கப்பட்டுள்ளது. நாடாளுமன்றத் தேர்தல் மற்றும் உட்கட்சி விவகாரங்களில் ஏற்பட்ட சில முரண்பாடுகளே இந்த நீக்கத்திற்குத் தூண்டுகோலாக அமைந்ததாகக் கூறப்படுகிறது. தமிழக காங்கிரஸ் கமிட்டிக்குள் நிலவும் கோஷ்டி பூசல் மற்றும் தலைமைக்கு எதிரான செயல்பாடுகள் காரணமாகவே இந்த ஒழுங்கு நடவடிக்கை மேற்கொள்ளப்பட்டுள்ளதாக அரசியல் நோக்கர்கள் கருதுகின்றனர்.