விலை அதிகம்.. ஆனால் உணவில் புழுவா?!… காஸ்ட்லி உணவகங்களின் முகத்திரையைக் கிழித்த இளைஞர்… இணையத்தை உலுக்கும் வீடியோ…!!

குருகிராமில் உள்ள பிரபல உணவகம் ஒன்றில் வழங்கப்பட்ட உணவில் உயிருடன் புழு நெளிந்த சம்பவம் சமூக வலைத்தளங்களில் பெரும் அதிர்ச்சியை ஏற்படுத்தியுள்ளது. குருகிராமின் ஹொரைசன் சென்டரில் அமைந்துள்ள புகழ்பெற்ற ‘பால்’ பேக்கரி மற்றும் கஃபேக்கு உணவருந்தச் சென்ற சுலப் மாத்தூர் என்ற வாடிக்கையாளரின் உணவிலேயே இந்த புழு கண்டறியப்பட்டுள்ளது. இது தொடர்பான வீடியோவை அவர் தனது இன்ஸ்டாகிராம் பக்கத்தில் பகிர்ந்த நிலையில், அந்த வீடியோ தற்போது இணையத்தில் வைரலாகி வாடிக்கையாளர்களிடையே பீதியை உண்டாக்கியுள்ளது.

சம்பவத்தன்று காலை சுமார் 11 மணியளவில் தனது நண்பர்களுடன் குறித்த உணவகத்திற்குச் சென்ற சுலப், அங்கு 6-க்கும் மேற்பட்ட உணவுகளை ஆர்டர் செய்துள்ளார். அதில் அவர்கள் சாப்பிட்டுக் கொண்டிருந்த சீசர் சாலட்டில் உயிருள்ள புழு ஒன்று ஊர்ந்து செல்வதைக் கண்டு அவர்கள் கடும் அதிர்ச்சியடைந்தனர். உடனடியாக அந்தப் புழுவின் வீடியோவை பதிவு செய்த அவர், வாடிக்கையாளர்கள் சாப்பிடும் உணவின் சுகாதாரத்தில் உணவகம் சமரசம் செய்துள்ளது மிகவும் கவலைக்குரியது எனத் தெரிவித்து இணையத்தில் பதிவேற்றினார். இந்த வீடியோ 10 லட்சத்திற்கும் அதிகமான பார்வைகளைக் கடந்து மக்களிடையே கொந்தளிப்பை ஏற்படுத்தியுள்ளது.

இந்த சம்பவம் சமூக வலைத்தளங்களில் பெரும் சர்ச்சையானதைத் தொடர்ந்து, பால் உணவக நிர்வாகம் வாடிக்கையாளரிடம் பகிரங்க மன்னிப்பு கோரியுள்ளது. உணவின் தரம் மற்றும் சுகாதாரத்தில் தாங்கள் மிகுந்த கவனம் செலுத்துவதாகவும், இந்த எதிர்பாராத தவறுக்காக வருந்துவதாகவும் அவர்கள் இன்ஸ்டாகிராம் மற்றும் வாட்ஸ்அப் மூலம் விளக்கமளித்தனர். இருப்பினும், இது வெறும் சம்பிரதாயத்துக்காக அனுப்பப்பட்ட மெசேஜ் என்றும், அவர்கள் இந்த விவகாரத்தை உண்மையில் பெரிதாக எடுத்துக்கொள்ளவில்லை என்றும் சுலப் குற்றம் சாட்டியுள்ளார். அதிக விலை கொடுத்து சாப்பிடும் இதுபோன்ற உயர்தர உணவகங்களில் நடக்கும் இந்த அலட்சியப் போக்கு நெட்டிசன்கள் மத்தியில் கடும் அதிருப்தியை ஏற்படுத்தியுள்ளது.