“என் புருஷன் வேணுமா? அப்போ 1.5 கோடி கொடு” …. மனைவியின் அதிரடி டீல், சம்மதித்த காதலி…. சினிமாவையே மிஞ்சிய சம்பவம்…..!

மத்தியப் பிரதேச மாநிலம் போபாலில் சினிமா கதையையே மிஞ்சும் வகையில் ஒரு விசித்திரமான சம்பவம் அரங்கேறியுள்ளது. மத்திய அரசுத் துறையில் பணியாற்றும் 42 வயது பெண் அதிகாரி ஒருவர், ஏற்கனவே திருமணமான 54 வயது நபர் ஒருவரை காதலித்து வந்துள்ளார். அந்த நபருக்கு 16 வயதில் ஒரு மகனும், 12 வயதில் ஒரு மகளும் உள்ளனர். இவர்களது கள்ளக்காதல் விவகாரம் அந்த நபரின் மனைவிக்கு தெரியவந்ததையடுத்து, குடும்பத்தில் கடும் மோதல்கள் ஏற்பட்டு, குழந்தைகளின் எதிர்காலமும் கேள்விக்குறியானது.

இந்த விவகாரம் குடும்ப நீதிமன்றத்திற்குச் சென்றபோது, அந்த நபர் தனது மனைவியுடன் வாழ விருப்பமில்லை என்றும், தனது காதலியுடன் செல்லவே விரும்புவதாகவும் பிடிவாதமாகத் தெரிவித்தார். அதே சமயம், தனது குழந்தைகள் மீது தமக்கு மிகுந்த பாசம் இருப்பதாகவும் அவர் கூறினார். இதனால் இரு தரப்பினருக்கும் இடையே சுமூகமான முடிவை எட்ட ஆலோசனைகள் வழங்கப்பட்டன. அப்போது அந்த நபரின் மனைவி, தனது குழந்தைகளின் எதிர்கால பாதுகாப்பிற்காக ஒரு விசித்திரமான நிபந்தனையை விதித்தார்.

தனது கணவரை விவாகரத்து செய்து காதலியுடன் அனுப்பி வைக்க வேண்டுமானால், இழப்பீடாக 1.5 கோடி ரூபாய் மதிப்பிலான சொத்து அல்லது ரொக்கப் பணம் வழங்க வேண்டும் என்று அந்த மனைவி நிபந்தனை விதித்தார். யாரும் எதிர்பாராத விதமாக, அந்த அரசு பெண் அதிகாரி இந்த நிபந்தனைக்கு உடனடியாகச் சம்மதித்தார். தனது காதலனைத் தன்னுடனே வைத்துக் கொள்வதற்காக, தன்னிடம் இருந்த ஒரு பிளாட் மற்றும் சுமார் 27 லட்சம் ரூபாய் ரொக்கப் பணத்தை அந்த மனைவியிடம் ஒப்படைக்க அவர் முன்வந்தார்.

பணம் மற்றும் சொத்துகளைப் பெற்றுக்கொண்ட மனைவி, தனது கணவரை விவாகரத்து செய்து அந்தப் பெண்ணுடன் செல்ல அனுமதித்தார். “கணவரை விலை கொடுத்து வாங்கிய பெண் அதிகாரி” என இந்தச் செய்தி தற்போது சமூக வலைதளங்களில் காட்டுத்தீயாய் பரவி வருகிறது. 90-களில் வெளியான ‘இரட்டை ரோஜா’ திரைப்படத்தின் கதையை நினைவுபடுத்தும் வகையில் அமைந்துள்ள இந்தச் சம்பவம், உறவுகளுக்கு இடையே பணமும் சொத்தும் குறுக்கிடும்போது ஏற்படும் மாற்றங்களுக்கு ஒரு சாட்சியாக மாறியுள்ளது.