“என்ன ஹீரோவா போட்டு ரஜினிய காமெடியனாக போடுங்க… நீங்க சொல்ற சம்பளத்த வாங்கிக்குறன்” – தயாரிப்பாளருக்கு ஷாக் கொடுத்த கவுண்டமணி!

தமிழ் சினிமாவில் கோலோச்சிய நகைச்சுவை நடிகர்களின் பட்டியலை போட்டால் அதில் தவிர்க்க முடியாத ஒரு இடத்தில் இருப்பார் கவுண்டமணி. 60களிலேயே சில படங்களில் துணைக் கதாபாத்திரங்களில், முகம் தெரியாத கதாபாத்திரங்களில் நடித்து வந்த கவுண்டமணிக்கு பாரதிராஜா இயக்கிய 16 வயதினிலே திரைப்படம்தான் திருப்புமுனையாக அமைந்தது. அந்த படத்தில் ரஜினிகாந்த் உடன் இருந்து அவரை டிரிகர் செய்யும் கதாபாத்திரத்தில் கவுண்டமணி கலக்கியிருப்பார். படத்தில் அவர் சொல்லும் ‘பத்த வச்சிட்டியே பரட்ட்’ வசனம் இன்று வரை பிரபலமாக இருந்து வருகிறது.

16 வயதினிலே திரைப்படம் பெரிய ஹிட்டானதும் அடுத்தடுத்து அவருக்கான வாய்ப்புகள் உருவாகி, 80 களில் 90 களில் அவர் உச்ச நடிகரானார். கவுண்டமணி உச்சத்தை தொட்டபோதும் சில இயக்குனர்களின் படங்களில் தொடர்ந்து குறைவான சம்பளத்துக்கு நடித்து வந்தார். அப்படி ஒரு இயக்குனர்தான் வீ சேகர்.

அப்படி கவுண்டமணி நடித்த படம்தான் ஒன்னா இருக்க கத்துக்கணும். அந்த படத்தில் சிவகுமார் கதாநாயகனாக நடித்திருந்தாலும், அவருக்கு நிகரான வேடத்தில் கவுண்டமணி நடித்திருந்தார். கிட்டத்தட்ட அவரை அந்த படத்தின் ஹீரோ என்றே சொல்லலாம். அதனால் அந்த படத்துக்குக் குறைவான சம்பளமே பெற்றுக் கொண்டாராம்.

இதையறிந்த ஏவிஎம் நிறுவனம் அடுத்து தங்கள் படமான எஜமான் படத்தில் நடிக்க கவுண்டமணிக்கு அதே சம்பளத்தையே பேசியுள்ளனர். ஆனால் கவுண்டமனி தான் வழக்கமாக வாங்கும் சம்பளத்தை சொல்லியுள்ளார்.  அந்த படத்துக்கு அவ்வளவுதானே வாங்கினீர்கள் என்று ஏவிஎம் நிறுவனம் கேட்டுள்ளது.

அதற்கு “அந்தபடத்தில் நான்தான் ஹீரோ. என்னை ஹீரோவாக போட்டு ரஜினியை காமடியான போட்டு படம் எடுங்கள். நீங்கள் சொல்லும் சம்பளத்தை வாங்கிக் கொள்கிறேன்” எனக் கூறி ஷாக் கொடுத்துள்ளார். இதன் பிறகு ஏவிஎம் நிறுவனம் அவர் கேட்ட சம்பளத்தையே கொடுத்தனராம்.