தங்கம் விலையில் எதிர்பாராத திருப்பம்…. போர் பதற்றத்திலும் இப்படியொரு ட்விஸ்ட்டா?…. ஷாக் நியூஸ்….!

சர்வதேச சந்தையில் நிலவி வரும் பல்வேறு மாற்றங்களுக்கு மத்தியில், சென்னையில் ஆபரணத் தங்கத்தின் விலை கடந்த சில நாட்களாகத் தொடர்ந்து சரிவைச் சந்தித்து வருகிறது. வழக்கமாகப் போர்ச் சூழல் நிலவும் போது பாதுகாப்பான முதலீடாகக் கருதப்படும் தங்கத்தின் விலை உயரும். ஆனால், தற்போதைய மத்திய கிழக்கு மோதல்களுக்கு மத்தியிலும், முதலீட்டாளர்கள் தங்கத்தை விடுத்து அமெரிக்க டாலரை நோக்கித் தங்கள் கவனத்தைத் திருப்பியுள்ளதால் தங்கத்தின் விலை குறைந்து வருவது குறிப்பிடத்தக்கது.

தங்கத்தின் விலை குறைவுக்கு மற்றொரு முக்கிய காரணமாக டாலரின் மதிப்பு உயர்வு பார்க்கப்படுகிறது. ஈரானின் பதிலடித் தாக்குதல்களை எதிர்கொள்ள மத்திய கிழக்கு நாடுகள் டாலர் பணப்புழக்கத்தை நாடியுள்ளன. மேலும், சர்வதேச அளவில் கச்சா எண்ணெய் வர்த்தகம் டாலரில் நடைபெறுவதால், அதன் தேவை அதிகரித்துள்ளது. பொதுவாக டாலர் மதிப்பு உயரும்போது தங்கத்தின் விலை சரிவது உலகளாவிய சந்தை விதியாகும்; அதுவே தற்போதும் எதிரொலித்து வருகிறது.

சென்னையில் இன்றைய விலை நிலவரப்படி, ஆபரணத் தங்கம் ஒரு சவரன் 1,21,600 ரூபாய்க்கு விற்பனை செய்யப்படுகிறது. நேற்று ஒரே நாளில் மட்டும் கிராமுக்கு 265 ரூபாய் குறைந்து, ஒரு கிராம் ஆபரணத் தங்கம் 15,200 ரூபாய்க்கு விற்கப்பட்டது. கடந்த பிப்ரவரி இறுதியில் ஒரு சவரன் தங்கம் 1,26,000 ரூபாயைத் தாண்டி விற்பனை செய்யப்பட்ட நிலையில், தற்போது படிப்படியாகக் குறைந்து வருவது நகை பிரியர்களுக்கு ஓரளவுக்கு நிம்மதியை அளித்துள்ளது.

இருப்பினும், சர்வதேச சந்தையில் தங்கம் விலை இன்று லேசான ஏற்றத்தைச் சந்தித்துள்ளதால், இந்தியச் சந்தையிலும் அதன் தாக்கம் இருக்கலாம் என எதிர்பார்க்கப்படுகிறது. எனவே, இந்த விலை சரிவு தற்காலிகமானதா அல்லது இன்னும் குறையுமா என்பதைப் பொறுத்திருந்துதான் பார்க்க வேண்டும். தங்கத்தைப் போலவே வெள்ளியின் விலையிலும் அவ்வப்போது ஏற்ற இறக்கங்கள் காணப்படுகின்றன.