“ஈரான் போர்: பெருசா ஏதோ நடக்கபோகுது”… உலகை உலுக்கும் கீதா கோபிநாத்தின் ட்வீட்… இந்தியாவுக்கு ஆபத்தா..?

சர்வதேச நாணய நிதியத்தின் (IMF) முன்னாள் துணை நிர்வாக இயக்குநர் கீதா கோபிநாத், ஈரான் மோதல் குறித்து விடுத்துள்ள எச்சரிக்கை உலகப் பொருளாதார வட்டாரத்தில் பெரும் அதிர்வலைகளை ஏற்படுத்தியுள்ளது. ஐக்கிய அரபு அமீரகம் (UAE) அமெரிக்காவுடன் ‘கரன்சி ஸ்வாப் லைன்’ (Currency Swap Line) ஒப்பந்தம் குறித்து ஆலோசித்து வருவது, வரவிருக்கும் பொருளாதாரப் புயலின் அறிகுறியாக அவர் பார்க்கிறார். சந்தைகள் தற்போது காட்டும் அமைதியை விட, இந்த மோதலின் உண்மையான பாதிப்புகள் மிகவும் ஆழமாகவும், தீவிரமாகவும் இருக்கும் என்பதை இத்தகைய முன்னெச்சரிக்கை நடவடிக்கைகள் சுட்டிக்காட்டுகின்றன.

‘கரன்சி ஸ்வாப் லைன்’ என்பது இரு நாடுகளுக்கு இடையேயான ஓர் அவசரகால நிதி ஏற்பாடாகும். இதன் மூலம் ஒரு நாடு கடுமையான டாலர் பற்றாக்குறையை சந்திக்கும் போது, தன்னிடம் உள்ள உள்ளூர் நாணயத்தை அமெரிக்காவிடம் வழங்கி, அதற்குப் பதிலாக அமெரிக்க டாலர்களை உடனடியாகப் பெற முடியும். பொதுவாக 2008 நிதி நெருக்கடி மற்றும் 2020 கொரோனா பெருந்தொற்று போன்ற உலகளாவிய பேரிடர் காலங்களில் மட்டுமே பயன்படுத்தப்படும் இந்த உத்தியை, தற்போது ஐக்கிய அரபு அமீரகம் கையில் எடுத்திருப்பது முதலீட்டாளர்களிடையே அச்சத்தை ஏற்படுத்தியுள்ளது.

சுமார் 1.5 டிரில்லியன் டாலர் மதிப்பிலான அரசு நிதியகங்களைக் (Sovereign Wealth Funds) கொண்டுள்ள ஐக்கிய அரபு அமீரகம் போன்ற ஒரு பணக்கார நாடு, அமெரிக்காவிடம் அவசர டாலர் உதவி கோருவது சாதாரணமான ஒன்றல்ல. ஈரான் உடனான பதற்றம் உச்சமடைந்துள்ள நிலையில், உலக எண்ணெய் வர்த்தகத்தின் உயிர்நாடியான ஹார்முஸ் நீரிணைப்பு (Strait of Hormuz) முடக்கப்பட்டால், அது மிகப்பெரிய டாலர் தட்டுப்பாட்டையும் மூலதன வெளியேற்றத்தையும் உருவாக்கும். இதனைச் சமாளிக்கவே அமீரகம் இப்போதே தயார் நிலையில் இறங்கியுள்ளது, இது போர் நீண்ட காலம் நீடிக்கும் என்பதற்கான மறைமுக சமிக்ஞையாகக் கருதப்படுகிறது.

கீதா கோபிநாத்தின் கூற்றுப்படி, தற்போதைய பங்குச் சந்தை மற்றும் எண்ணெய் விலை நிலவரங்கள் வரவிருக்கும் ஆபத்தை முழுமையாக உணரவில்லை. ஒருவேளை ஹார்முஸ் நீரிணையில் போக்குவரத்து தடைப்பட்டால், அது உலகளாவிய பணவீக்கம், எண்ணெய் விலை உயர்வு மற்றும் வர்த்தகப் பாதிப்புகளுக்கு வழிவகுக்கும். அடுத்த சில வாரங்களில் பங்குச் சந்தைகளில் பெரிய அளவிலான சரிவு ஏற்பட வாய்ப்புள்ளதாகவும், உலகப் பொருளாதாரம் ஒரு நீண்டகால தாக்கத்தை எதிர்கொள்ளத் தயாராக இருக்க வேண்டும் என்றும் நிபுணர்கள் எச்சரிக்கின்றனர்.