எம்.ஜி.ஆரின் நிழல்…. தமிழகத்தின் மூத்த அமைச்சர்…! வியக்க வைக்கும் டாக்டர் ஹண்டேவின் அரசியல் பயணம்…!!

தமிழகத்தின் மூத்த அரசியல் ஆளுமையும், முன்னாள் அமைச்சருமான 99 வயது டாக்டர் எச்.வி. ஹண்டே, சென்னை ஆயிரம் விளக்கு தொகுதியில் தனது வாக்கினைப் பதிவு செய்து இளைஞர்களுக்குப் பெரும் உத்வேகத்தை அளித்துள்ளார். 1946-ல் பிரிட்டிஷ் ஆட்சிக்காலத்திலேயே தனது முதல் வாக்கைப் பதிவு செய்த இவர், கடந்த 80 ஆண்டுகளாகத் தடையின்றித் தனது ஜனநாயகக் கடமையை ஆற்றி வருகிறார். எம்.ஜி.ஆர். அமைச்சரவையில் சுகாதாரத் துறை அமைச்சராகப் பணியாற்றிய இவர், 1984-ல் எம்.ஜி.ஆர். உடல்நலம் குன்றியபோது அவருக்கு நிழல் போல இருந்து சிகிச்சைகளை ஒருங்கிணைத்தவர். அமெரிக்காவிற்கு அவரை அழைத்துச் சென்றது முதல், அவர் சிகிச்சை பெற்றபோது ஆண்டிப்பட்டி தொகுதிக்கான வேட்புமனு ஆவணங்களைக் கையாண்டது வரை எம்.ஜி.ஆரின் நம்பிக்கைக்குரிய தளபதியாக விளங்கியவர்.

மருத்துவத் துறையில் சிறந்த சேவைக்காகப் பி.சி. ராய் விருது பெற்ற ஹண்டே, கம்ப ராமாயணத்தை ஆங்கிலத்தில் மொழிபெயர்க்கும் அளவுக்குப் புலமை மிக்கவர். எம்.ஜி.ஆரின் மருத்துவ ரகசியக் கோப்புகளை முப்பத்தைந்து ஆண்டுகளுக்கும் மேலாகப் பாதுகாத்து, பின்னர் அரசு வசம் ஒப்படைத்த நேர்மைக்குச் சொந்தக்காரர். தள்ளாத வயதிலும் தட்டு தடுமாறாமல் வாக்குச்சாவடிக்கு வந்து அவர் வாக்களித்ததைப் பிரதமர் மோடி பாராட்டியுள்ளார். “வாக்களிப்பது என்பது ஒரு உரிமை மட்டுமல்ல, அது தேசத்தின் எதிர்காலத்தைத் தீர்மானிக்கும் பொறுப்பு” என்று அவர் விடுத்த செய்தி, இன்றைய இளைய தலைமுறையினருக்கு ஒரு பாடமாக அமைந்துள்ளது.