6 வருஷமா இல்லாத பிறந்தநாள் கொண்டாட்டம்… திடீரென மாயமான சாமியார்…. ஆலம்பூண்டி குழந்தைக் கடத்தல் வழக்கில் வெளியாகும் பகீர் தகவல்கள்….!

விழுப்புரம் மாவட்டம் செஞ்சி அருகே உள்ள ஆலம்பூண்டி குளக்கரை தெருவைச் சேர்ந்த கூலித் தொழிலாளி வடிவேலு – பவானி தம்பதியின் 7 வயது மகள் ஹேமாவதி காணாமல் போன வழக்கு, தமிழகம் முழுவதும் பெரும் அதிர்ச்சியை ஏற்படுத்தியுள்ளது. உள்ளூர் காவல்துறையினர் 10 நாட்கள் தேடியும் எந்தத் துப்பும் கிடைக்காததால், இவ்வழக்கு தற்போது சிபிசிஐடி பிரிவுக்கு மாற்றப்பட்டு விசாரணை தீவிரப்படுத்தப்பட்டுள்ளது. தொடக்கத்திலிருந்தே பல்வேறு முரண்பாடுகளுடன் நகரும் இந்த வழக்கில், தற்போது வெளியாகியுள்ள புதிய தகவல்கள் பலத்த சந்தேகங்களை எழுப்பியுள்ளன.

சிறுமி காணாமல் போனதாகக் கூறப்படும் அக்டோபர் 11-ஆம் தேதி இரவு, பெற்றோரும் பாட்டியும் சிறுமியுடன் ஒரே அறையில்தான் படுத்து உறங்கியுள்ளனர். நள்ளிரவில் குழந்தை மட்டும் எப்படி எழுந்து வெளியே சென்றார், யாருக்கும் எந்தவித சத்தமும் கேட்கவில்லையா அல்லது யாராவது கதவைத் திறந்து குழந்தையைத் தூக்கிச் சென்றார்களா என்ற கேள்விகள் விடைதெரியாத புதிராகியுள்ளன. இந்த முரண்பாடுகளை உடைக்க, சிறுமியின் பெற்றோர் மற்றும் பாட்டியிடம் புலனாய்வு அதிகாரிகள் தீவிர விசாரணை நடத்தி வருகின்றனர்.

வழக்கின் இரண்டாவது முக்கிய சந்தேகப் புள்ளியாக, சிறுமியின் பிறந்தநாள் விவகாரம் மாறியுள்ளது. கடந்த ஆறு ஆண்டுகளாக ஒருமுறை கூட பிறந்தநாள் கொண்டாடப்படாத நிலையில், இந்த ஆண்டு மட்டும் திடீரென கேக் வெட்டிப் பிறந்தநாள் விமரிசையாகக் கொண்டாடப்பட்டுள்ளது. அன்றைய தினம் எடுக்கப்பட்ட வீடியோக்களும் சமூக வலைதளங்களில் வெளியாகி பலரைக் கலங்கவைத்துள்ள நிலையில், இந்த திடீர் கொண்டாட்டத்திற்கான பின்னணி மற்றும் உள்நோக்கம் குறித்து போலீசார் தீவிரமாக விசாரித்து வருகின்றனர்.

இவை எல்லாவற்றையும் விடப் பெரும் சந்தேகத்தை ஏற்படுத்தியிருப்பது சரவணன் என்ற சாமியாரின் திடீர் தலைமறைவு ஆகும். சிறுமி காணாமல் போன அதே தினத்தில் ஊரைவிட்டு மாயமான அந்த சாமியாரின் செல்போன் டவர் இருப்பிடத்தை ஆய்வு செய்த தனிப்படை போலீசார், அவரை திருவண்ணாமலை வழியாகச் சென்று விழுப்புரம் அரசூர் பகுதியில் பதுங்கியிருந்தபோது பிடித்து விசாரணைக்குட்படுத்தியுள்ளனர். மூடநம்பிக்கை, நரபலி அல்லது ஏதேனும் செய்வினை சடங்குகளுக்காக குழந்தை கடத்தப்பட்டதா என்ற கோணத்திலும் விசாரணை நடக்கிறது.

பிறந்தநாள் கொண்டாட்டம், ஒரே அறையில் தூங்கிய குடும்பத்தினர், திடீரென ஊரைவிட்டு ஓடிய சாமியார் என அனைத்துச் சந்தேகங்களும் ஒரே புள்ளியில் வந்து நிற்கின்றன. வெளிப்புறக் கடத்தல் கும்பல் குழந்தையைத் தூக்கிச் சென்றதா அல்லது குடும்பத்திற்குத் தெரிந்த நபர்களே இதற்குப் பின்னணியில் உள்ளனரா என்ற மர்ம முடிச்சுகளை அவிழ்க்க சிபிசிஐடி போலீசார் இரவு பகலாகத் துப்பறிந்து வருகின்றனர்.