தோண்ட தோண்ட பூதம்…. தூக்கத்தை தொலைத்த ஜெம் வீரமணி…. சிக்கியது 8 போன்கள், 55 ரகசிய ஆவணங்கள்…. ஓட்டுநர்கள் கக்கிய பகீர் உண்மை…!

ஜெம் கிரானைட் நிறுவனத்தின் உரிமையாளர் வீரமணி மீதான சிறுமிகள் பாலியல் வன்கொடுமை வழக்கு தமிழகம் முழுவதும் பெரும் அதிர்வலைகளை ஏற்படுத்தியுள்ளது. சென்னை பெருநகர காவல் விபச்சார தடுப்புப் பிரிவில் பெறப்பட்ட பென்டிரைவ் (Pendrive) வீடியோ ஆதாரங்களின் அடிப்படையில், சிறுமியைப் பாலியல் துன்புறுத்தலுக்கு உள்ளாக்கியது தொடர்பாக மத்திய குற்றப்பிரிவு காவல்துறையினர் முதற்கட்டமாக வழக்குப் பதிவு செய்தனர். தொடர்ந்து, பல்வேறு சிறுமிகள் அவர் மீது புகார்களை அளித்து வரும் நிலையில், இவ்வழக்கை முழுமையாக விசாரிக்க தமிழக டிஜிபி மகேஷ்குமார் அகர்வால் தலைமையில் சிறப்பு புலனாய்வுக் குழு அமைக்கப்பட்டுத் தீவிர விசாரணை மேற்கொள்ளப்பட்டு வருகிறது.

இந்த பாலியல் குற்றங்களுக்கு உடந்தையாக இருந்ததாக வீரமணியுடன் சேர்த்து, சாந்தி, மகேந்திர சிம்ஹன் மற்றும் வீடியோ ஆதாரத்தை மறைத்த குற்றத்திற்காக கணேசன் ஆகியோர் ஏற்கனவே கைது செய்யப்பட்டுச் சிறையில் அடைக்கப்பட்டுள்ளனர். வீரமணி மீது இதுவரை நான்கு வழக்குகள் நிலுவையில் இருந்த நிலையில், கடந்த அக்டோபர் 2-ஆம் தேதி மேலும் ஒரு புதிய வழக்கு பதிவு செய்யப்பட்டது. இதன்மூலம் அவர் மீதான மொத்த வழக்கின் எண்ணிக்கை ஐந்தாக உயர்ந்துள்ளது.

இந்நிலையில், இவ்வழக்கின் தொடர் விசாரணையில் வீரமணிக்குச் சிறுமிகளை அழைத்து வந்து பாலியல் துன்புறுத்தல்களுக்குத் துணைபோன அதிர்ச்சித் தகவல் வெளிவந்தது. இதனைத் தொடர்ந்து, வீரமணியிடம் சுமார் 23 ஆண்டுகளாக ஓட்டுநராகப் பணியாற்றிய லாசர், 8 ஆண்டுகளாகப் பணியாற்றிய பாபு மற்றும் பார்த்திபன் ஆகிய மூன்று கார் ஓட்டுநர்களையும் சிறப்பு புலனாய்வுக் குழுவினர் அடையாளம் கண்டு கைது செய்துள்ளனர்.

கைது செய்யப்பட்ட ஓட்டுநர்களின் வீடுகளில் நடத்தப்பட்ட அதிரடிச் சோதனையில் 8 செல்போன்கள் மற்றும் 55 முக்கிய ஆவணங்களை அதிகாரிகள் பறிமுதல் செய்துள்ளனர். இந்த வழக்கில் மேலும் பல அதிர்ச்சித் தகவல்கள் வெளிவர வாய்ப்புள்ள நிலையில், சிறப்பு புலனாய்வுக் குழுவினர் விசாரணையைத் தீவிரப்படுத்தியுள்ளனர்.