என் குழந்தைக்கு ஸ்கூல் பீஸ் கூட கட்ட முடியல, அந்த படத்தால குடும்பத்துல 5 பேர் உயிர் போயிடுச்சு.. நேரலையில் புலம்பிய கஞ்சா கருப்பு..

பிதாமகன் படத்தில், டேய் கஞ்சா கொடுக்கி, பாட்ட போட்றா என்ற காட்சியில் வந்தவர்தான் கஞ்சா கருப்பு. பின், இயக்குநர் அமீர் இயக்கிய ராம் படத்தில் ஆளவந்தான் கேரக்டரில் காமெடியில் அசத்தியிருப்பார். பல படங்களில் நடித்து முன்னணி காமெடி நடிகர்களில் ஒருவராக மாறிய அறை எண் 305ல் கடவுள் படத்தில், இவரும் சந்தானமும்தான் ஹீரோக்கள். தனது 100வது படத்தை வேல்முருகன் போர்வெல்ஸ் என்ற படத்தை தயாரித்து, பலத்த நஷ்டத்தை சந்தித்தவர் கஞ்சா கருப்பு. இப்போது இறைவன் மிகப் பெரியவன், சபரி ஐயப்பா, நல்லது செய்யப் போறோம், ஓம்காளி ஜெய்காளி உள்ளிட்ட படங்களில் நடித்து வருகிறார்.

சமீபத்தில் ஒரு நேர்காணலில் நடிகர் கஞ்சா கருப்பு கூறியதாவது, இப்போது பிக்பாஸ் நிகழ்ச்சிக்கு அழைத்தாலும் போவேன். ஒரு கெஸ்ட் மாதிரி போயிட்டு, 2 நாள் மட்டும் அந்த வீட்டுல இருந்துட்டு வந்துடுவேன். ரொம்ப நாளெல்லாம் அந்த வீட்டில் என்னால் இருக்கவே முடியாது. என்னுடைய உழைப்பே என் புள்ளைங்களை பாதுகாக்கணும். இன்னைக்கு நிலைமைக்கு என்னோட குழந்தைக்கு என்னால ஸ்கூல் பீஸ் கட்ட முடியலை. பள்ளிக்கூடத்துல இருந்து அனுப்பிச்சிட்டாங்க. நான் பணம் கட்டறேன்னு சொல்லி ரெண்டு நாள் டைம் வாங்கியிருக்கேன்.

உலகத்துக்கே நான் செஞ்சுக்கிட்டு இருக்கேன். என் குழந்தைகளுக்கு என்னால பீஸ் கட்ட முடியலை. என் மனசுக்குள்ள வருத்தமாகி எனக்குள்ளே நானே அழுதுகிட்டு இருக்கேன். இப்படி வருத்தப்பட்ட அழுத விஷயங்கள் நிறைய இருக்கு. சினிமா படம் எடுக்கப் போய் என்னோட ஒரு தப்பான பயணத்தை நான் உருவாக்கி, என்னோட லெட்டர் பேடுல கையெழுத்து போட்டது, என்னோட வவுச்சர்ல கையெழுத்து போட்டது மிகப்பெரிய தப்பு. இதனால அஞ்சு உயிர் போயிருக்கு. எப்படி இருந்த கஞ்சா கருப்பு இப்படி ஆயிட்டானேன்னு நினைச்சு வேதனைப்பட்டு அஞ்சு பேரு இறந்து போயிட்டாங்க. ஆனா யாருக்கும் தெரியாது. என்னோட அக்கா பையன், எங்க அய்யா, எங்க ஆயா அதுக்கு அப்பறம் என்னோட மாமா இப்படி அஞ்சு பேரோட உயிர் போயிருக்கு. இந்த படம் பண்ணினதால் இப்படி ஆயிடுச்சு, என்று வருத்தப்பட்டு பேசி இருக்கிறார் நடிகர் கஞ்சா கருப்பு.