“900-க்கும் மேற்பட்டோர் பலி.. மீள முடியாமல் தவிக்கும் வெனிசுலா”…. மீண்டும் அதிர்ந்த பூமி… பேரழிவுக்கு மத்தியில் அடுத்த அதிர்ச்சி….!

வெனிசுலா நாட்டில் கடந்த 24-ஆம் தேதி அடுத்தடுத்து ஏற்பட்ட சக்தி வாய்ந்த இரட்டை நிலநடுக்கம், அந்த நாட்டையே உலுக்கிப் போட்டுள்ளது. ரிக்டர் அளவுகோலில் முறையே 7.2 மற்றும் 7.5 ஆகப் பதிவான இந்த நிலநடுக்கங்களால், அங்குள்ள அடுக்குமாடிக் குடியிருப்புகளும் கட்டடங்களும் சீட்டுக்கட்டுகளைப் போலச் சரிந்து விழுந்துள்ளன. இடிபாடுகளுக்குள் சிக்கி இதுவரை 920-க்கும் மேற்பட்டோர் உயிரிழந்துள்ளதோடு, 3,360-க்கும் அதிகமான மக்கள் படுகாயமடைந்து மருத்துவமனைகளில் அனுமதிக்கப்பட்டுள்ளனர். இன்னும் நூற்றுக்கணக்கானோர் இடிபாடுகளுக்குள் சிக்கியிருக்கலாம் என்பதால், மீட்பப் பணிகள் தொடர்ந்து தீவிரமாக நடைபெற்று வரும் வேளையில் பலி எண்ணிக்கை மேலும் அதிகரிக்கக்கூடும் என அஞ்சப்படுகிறது.

அமெரிக்காவின் அண்டை நாடான வெனிசுலாவில், கரீபியன் கடற்பகுதியை ஒட்டியுள்ள வடக்கு கடற்கரை நகரங்களில் இந்தத் துயரம் அரங்கேறியுள்ளது. நிலநடுக்கம் ஏற்பட்டு இன்று மூன்றாவது நாளாக மீட்புக் குழுவினர் இரவு பகலாகப் போராடி வரும் நிலையில், அங்கு நிலவும் சூழல் மிகவும் கவலைக்கிடமாக உள்ளது. இதற்கிடையே, தலைநகர் கராகஸ் மற்றும் அதனைச் சுற்றியுள்ள மராகே உள்ளிட்ட நகரங்களில் நேற்று திடீரென மீண்டும் ஒரு நிலநடுக்கம் ஏற்பட்டுள்ளது. இது ரிக்டர் அளவுகோலில் 4.9 ஆகப் பதிவாகியுள்ளது.

ஏற்கனவே ஏற்பட்ட இரட்டை நிலநடுக்கத்தின் பேரழிவில் இருந்து மீள முடியாமல் தவித்து வரும் வெனிசுலா மக்களுக்கு, இந்தத் தொடர் நில அதிர்வுகள் மேலும் பெரும் அதிர்ச்சியையும் பீதியையும் ஏற்படுத்தியுள்ளன. எப்போது என்ன நடக்குமோ என்ற அச்சத்தில் பொதுமக்கள் வீடுகளை விட்டு வெளியேறி வீதிகளில் தஞ்சமடைந்துள்ளனர். இந்த இயற்கை பேரிடரால் நிலைகுலைந்து போயுள்ள வெனிசுலாவுக்கு சர்வதேச நாடுகள் தங்களின் இரங்கலையும், மீட்புப் பணிகளுக்கான உதவிகளையும் வழங்கி வருகின்றன.