இபிஎஸ் கோட்டையில் விழும் அடுத்த விக்கெட்…. திமுகவுக்கு தாவும் அதிமுகவின் முன்னாள் அமைச்சர்… அதிர்ச்சியில் எடப்பாடி….!

அதிமுக முன்னாள் அமைச்சரும், திருப்பத்தூர் மாவட்டத்தின் முக்கியப் புள்ளியுமான நிலோபர் கபில், விரைவில் திமுகவில் இணையப் போவதாக வெளியாகி இருக்கும் செய்திகள் தமிழக அரசியலில் பெரும் பரபரப்பை ஏற்படுத்தியுள்ளது. திருப்பத்தூர் மாவட்ட அதிமுகவில் நிலவி வரும் உட்கட்சிப் பூசல் மற்றும் கோஷ்டி மோதல்கள் காரணமாக நிலோபர் கபில் தொடர்ந்து ஓரங்கட்டப்பட்டு வந்ததாகவும், இதனால் அவர் மிகுந்த மனவருத்தத்தில் இருந்ததாகவும் கூறப்படுகிறது. கட்சியின் முக்கிய முடிவுகளில் தமக்கு உரிய முக்கியத்துவம் அளிக்கப்படாததே இந்த அதிருப்திக்கு முக்கியக் காரணமாகப் பார்க்கப்படுகிறது.

வரும் பிப்ரவரி 14-ஆம் தேதி ஜோலார்பேட்டை அருகே பொன்னேரியில் திமுக சார்பில் பிரம்மாண்டமான வாக்குச்சாவடி முகவர்கள் பயிற்சி முகாம் நடைபெற உள்ளது. இந்த விழாவில் பங்கேற்க உள்ள தமிழக முதலமைச்சர் மு.க.ஸ்டாலின் முன்னிலையில், நிலோபர் கபில் தனது ஆதரவாளர்களுடன் அதிகாரப்பூர்வமாக திமுகவில் இணைவார் என்று எதிர்பார்க்கப்படுகிறது. இதற்கான முன்னேற்பாடுகள் ரகசியமாக நடைபெற்று வருவதாகவும், இதன் மூலம் அதிமுகவின் ஒரு பலமான விக்கெட் சரியப் போவதாகவும் அரசியல் வட்டாரங்கள் தெரிவிக்கின்றன.

2026 சட்டமன்றத் தேர்தலை முன்னிட்டு அதிமுக பொதுச்செயலாளர் எடப்பாடி பழனிசாமி கட்சியை வலுப்படுத்தும் பணிகளில் தீவிரமாக ஈடுபட்டு வரும் வேளையில், முன்னாள் அமைச்சரே வெளியேறுவது அதிமுக தலைமைக்கு கடும் அதிர்ச்சியை ஏற்படுத்தியுள்ளது. நிலோபர் கபில் போன்ற சிறுபான்மையின சமூகத்தைச் சேர்ந்த ஒரு செல்வாக்கு மிக்க தலைவர் வெளியேறுவது, குறிப்பிட்ட மாவட்டங்களில் அதிமுகவின் வாக்கு வங்கியில் தாக்கத்தை ஏற்படுத்தக்கூடும் என்பதால், இது அக்கட்சியின் தொண்டர்களிடையே கலக்கத்தை ஏற்படுத்தியுள்ளது.