“பண்றதுல பன்னிட்டு தப்பு என் மேலயா”… இதெல்லாம் சரியா ஸ்டாலின் சார்… அன்னைக்கு போலீஸ் ஏன் எங்களை எச்சரிக்கல?… கரூரில் ஆவேசமடைந்த CM விஜய்…!

கரூரில் கடந்த ஆண்டு செப்டம்பர் 27-ஆம் தேதி நடைபெற்ற தேர்தல் பரப்புரையின் போது ஏற்பட்ட எதிர்பாராத கூட்ட நெரிசலில் சிக்கி 41 பேர் உயிரிழந்த துயரச் சம்பவம் நடந்து ஒன்பது மாதங்கள் கடந்துள்ள நிலையில், தமிழக முதல்வர் விஜய் கரூர் மாவட்டத்திற்கு நேரில் சென்றுள்ளார். புதிய தொழில்களுக்கான அடிக்கல் நாட்டு விழா மற்றும் கூட்ட நெரிசலில் உயிரிழந்தவர்களின் குடும்பங்களைச் சேர்ந்த 32 உறுப்பினர்களுக்குக் கருணை அடிப்படையில் அரசுப் பணி நியமன ஆணைகளை வழங்கும் முக்கிய நிகழ்வுகளில் அவர் பங்கேற்றார். சென்னையிலிருந்து தனி விமானம் மூலம் திருச்சி சென்று, அங்கிருந்து சாலை மார்க்கமாகக் கரூர் வந்தடைந்த முதல்வர், பாதிக்கப்பட்ட குடும்பங்களுக்குத் தன் ஆறுதலையும் அரசு உதவிகளையும் நேரடியாக வழங்கினார்.

அரசு விழாவில் உணர்ச்சிப்பூர்வமாகவும் ஆக்ரோஷமாகவும் பேசிய முதல்வர் விஜய், தன் அரசியல் பயணத்தில் பல வலிகளைத் தாண்டி வந்திருந்தாலும், கரூர் சம்பவம் தன் மனதை மிக ஆழமாகக் காயப்படுத்திய ஒன்று எனக் குறிப்பிட்டார். அன்றைய தினம் அரியலூர் கூட்டத்தை முடித்துவிட்டு பெரம்பலூர் செல்லவிருந்த போது போலீசார் எச்சரித்ததால் அக்கூட்டத்தை ரத்து செய்ததை சுட்டிக்காட்டிய அவர், கரூரில் அளவுக்கு அதிகமாகக் கூட்டம் இருந்தும் போலீசார் தங்களை முன்கூட்டியே எச்சரித்துத் தடுக்கவில்லை என்று குற்றம் சாட்டினார். அசம்பாவிதங்களைத் தடுக்கும் அதிகாரம் இருந்தும், போலீசார் தங்களை நெடுஞ்சாலையிலிருந்து நேரடியாகக் கூட்டம் நடைபெற்ற இடத்திற்கே அழைத்துச் சென்றது ஒரு திட்டமிடப்பட்ட “மிகப்பெரிய நாடகம்” என்றும், இதன் பின்னணியில் இருந்து உத்தரவிட்டது யார் என்ற கேள்வியையும் அவர் எழுப்பினார்.

இத்துயரச் சம்பவத்தில் தன் அக்கா, தங்கைகளின் குழந்தைகளை இழந்த வலி ஒருபுறமிருக்க, சட்டசபையில் ஸ்டாலின் சார் பழியைத் தன் பக்கம் திருப்பிவிட்டு அரசியல் ஆதாயம் தேடுவதாக முதல்வர் விஜய் சாடினார். தான் மக்களுக்காக மட்டுமே அரசியலுக்கு வந்தவன் என்றும், தனக்கு என்றும் பணத்தை விட ஜனமே முக்கியம் என்றும் உறுதியளித்த அவர், பழி சுமத்தினால் தாம் மக்களை விட்டு ஓடிவிட மாட்டேன் எனக் கூறினார். மேலும், தங்களுக்கு இவ்வளவு பெரிய காயங்களைக் கொடுத்தவர்களுக்கு கடந்த 2026 சட்டமன்றத் தேர்தலில் மக்கள் தகுந்த பதிலடி கொடுத்துவிட்டதாகவும், இனி அவர்களால் காலத்திற்கும் எழுந்திருக்க முடியாத அளவிற்கு ஒரு நிரந்தரமான சம்மட்டி அடியை மக்கள் கொடுக்க வேண்டும் என்றும், தற்போதைய மக்கள் அரசை மாடல் மாடலாகக் குறை சொல்பவர்களால் தங்களைப் போல உண்மைகளை வெளிப்படையாகப் பேச முடியாது என்றும் முதல்வர் விஜய் கரூரில் மிக ஆக்ரோஷமாகப் பேசி முடித்தார்.