“என் மகனை காப்பாத்துங்க!”… 1 வயது மழலை தொண்டையில் சிக்கிய மீன்… நீல நிறமாக மாறிய உடல்… அந்த 10 நிமிடம் நடந்தது என்ன?… இந்தியாவையே உலுக்கிய அதிர்ச்சிச் சம்பவம்…!!

மத்தியப் பிரதேசத்தின் இந்தூர் நகரில் உள்ள எம்.ஒய் (MYH) அரசு மருத்துவமனை மருத்துவர்கள், ஒரு வயதுக் குழந்தையின் தொண்டையில் சிக்கியிருந்த 3 அங்குல நீளமுள்ள உயிருள்ள மீனை வெற்றிகரமாக அகற்றி உலகையே வியக்க வைத்துள்ளனர். மீன் தொட்டியைச் சுத்தம் செய்து கொண்டிருந்தபோது, எதிர்பாராதவிதமாக ‘கௌராமி’ வகை மீன் ஒன்று குழந்தையின் வாய்க்குள் சென்று தொண்டைப் பகுதியில் சிக்கிக்கொண்டது. இதனால் மூச்சுவிட முடியாமல் திணறிய அக்குழந்தையின் உடல் ஆக்சிஜன் குறைபாட்டால் நீல நிறமாக மாறியதுடன், வாயிலிருந்து இரத்தமும் வெளியேறியதால் நிலைமை மிகவும் கவலைக்கிடமானது.

மருத்துவமனைக்குக் கொண்டுவரப்பட்ட குழந்தையின் நிலையை உணர்ந்த காது, மூக்கு, தொண்டை துறைத் தலைவர் டாக்டர் யாமினி குப்தா தலைமையிலான குழுவினர், உடனடியாகச் சவாலான அறுவை சிகிச்சையைத் தொடங்கினர். தொண்டைக்குள் மீன் உயிருடன் இருந்ததால், அதன் துடுப்புகள் குழந்தையின் மூச்சுக்குழாயைக் கிழித்துவிடக்கூடும் என்ற பெரும் ஆபத்து நிலவியது. இருப்பினும், மருத்துவர்கள் எண்டோஸ்கோபி முறையைப் பயன்படுத்தி மிகுந்த நிபுணத்துவத்துடன் அந்த மீனை உயிருடன் வெளியேற்றினர். இந்த அரிய அறுவை சிகிச்சைக்குப் பிறகு குழந்தை அபாயக் கட்டத்தைத் தாண்டி தற்போது நலமுடன் உள்ளது.

இது குறித்துப் பேசிய மருத்துவர் யாமினி குப்தா, மத்திய இந்தியாவில் இவ்வளவு சிறிய குழந்தையின் தொண்டையில் உயிருள்ள மீன் சிக்கியது இதுவே முதல்முறை என்று தெரிவித்தார். இது வெறும் அறுவை சிகிச்சை மட்டுமல்லாமல் தங்களின் மருத்துவத் திறமைக்கான ஒரு பெரும் சோதனை என்றும் அவர் குறிப்பிட்டார். சிறு குழந்தைகளின் சுவாசப் பாதைகள் மிகவும் குறுகலாக இருப்பதால், பெற்றோர்கள் குழந்தைகளைக் கையாளும்போதும் அவர்களுக்கு அருகில் சிறு பொருட்களை வைக்கும்போதும் மிகுந்த எச்சரிக்கையுடன் இருக்க வேண்டும் என்று அவர் வலியுறுத்தியுள்ளார். இச்சம்பவம் மருத்துவர்களின் அசாத்திய சாதனையாகப் பார்க்கப்படுகிறது.