சின்ன கவனக்குறைவு..! தீபாவளி ஷாப்பிங்… பைக்கில் வெடித்த பட்டாசுகள்… நொடியில் மாறிய காட்சி… நடுவழியில் நடந்தது என்ன?…!!

உத்தரப் பிரதேச மாநிலம் பஹ்ரைச் மாவட்டத்தில் உள்ள கோட்வாலி நகர் பத்மா மார்க்கெட் பகுதியில், இருசக்கர வாகனத்தில் கொண்டு செல்லப்பட்ட பட்டாசுகள் திடீரென நடுவழியில் வெடித்துச் சிதறியதில் நான்கு இளைஞர்கள் காயமடைந்தனர். மக்கள் நடமாட்டம் மிகுந்த சந்தைப் பகுதியில் சனிக்கிழமை இரவு நிகழ்ந்த இந்த திடீர் வெடிப்பு அப்பகுதி மக்களிடையே பெரும் அதிர்ச்சியையும் அச்சத்தையும் ஏற்படுத்தியது. பைக்கில் பட்டாசுகளை எடுத்துச் சென்ற இருவருடன் சேர்த்து, சாலையோரம் நின்று கொண்டிருந்த மேலும் இரண்டு இளைஞர்களும் இந்த வெடிப்பின் தாக்கத்தில் சிக்கினர்.

விபத்தில் சக்கியாபுராவைச் சேர்ந்த நிமேஷ் ஸ்ரீவஸ்தவ் என்பவர் பலத்த காயங்களுக்கு உள்ளானார். அவருடன் அமன், அபிஷேக் மற்றும் அமித் பாண்டே ஆகியோரும் காயமடைந்தனர். அங்கிருந்த பொதுமக்கள் உடனடியாக நால்வரையும் மீட்டு அருகிலுள்ள மாவட்ட அரசு மருத்துவமனைக்கு அனுப்பி வைத்தனர். அங்கு மூவருக்கு ஆரம்பக்கட்ட முதலுதவி அளிக்கப்பட்டு வீடு திரும்ப அனுமதிக்கப்பட்ட நிலையில், தீவிர காயமடைந்த நிமேஷ் மட்டும் மேல் சிகிச்சைக்காக அரசு மருத்துவக் கல்லூரி மருத்துவமனைக்கு மாற்றப்பட்டார்.

இச்சம்பவம் தொடர்பாக கோட்வாலி நகர் காவல் நிலையப் பொறுப்பாளர் பிரிஜேந்திர மிஸ்ரா தலைமையிலான காவல்துறையினர் தீவிர விசாரணை நடத்தி வருகின்றனர். வாகனப் பயணத்தின் போது ஏற்பட்ட உராய்வாலா அல்லது வெளிப்புறத் தீப்பொறியால் பட்டாசுகள் வெடித்தனவா என்பது குறித்து ஆய்வு செய்யப்பட்டு வருகிறது. பண்டிகைக் காலங்களில் உரிய பாதுகாப்பு விதிமுறைகளைப் பின்பற்றாமல், அதிக அளவிலான பட்டாசுகளை இருசக்கர வாகனங்களில் எடுத்துச் செல்வது கடுமையான ஆபத்தை விளைவிக்கும் என்பதை இச்சம்பவம் வெளிப்படுத்துகிறது.