“எங்க போனாலும் நீதி கிடைக்கல” மேலே கையை வைத்த சீனியர் டாக்டர்… விடுதி அறையில் பிணமாகக் கிடந்த பெண் டாக்டர்.. போலீஸ் விசாரணையில் திடுக்கிடும் பின்னணி..!!

ஆக்ராவில் 28 வயது பெண் மருத்துவர் ஒருவர் தனது விடுதி அறையில் தற்கொலை செய்து கொண்ட சம்பவம் பெரும் அதிர்ச்சியை ஏற்படுத்தியுள்ளது. லக்னோவைச் சேர்ந்த டாக்டர் வர்த்திகா, ஆக்ராவிலுள்ள மனநல நிறுவனம் மற்றும் மருத்துவமனையில் (IMHH) எம்.டி (MD) படித்து வந்தார். ஞாயிற்றுக்கிழமை மாலை அவரது தாய் நீண்ட நேரமாக போன் செய்தும் வர்த்திகா எடுக்காததால், உடன் படிக்கும் சக மாணவர் சித்தார்த் சர்மாவிற்கு தகவல் தெரிவித்தார். சித்தார்த் அங்கு சென்று பார்த்தபோது அறை உட்புறமாக பூட்டப்பட்டிருந்ததால், போலீசாருக்கு தகவல் தெரிவிக்கப்பட்டது. கதவை உடைத்து உள்ளே சென்ற போலீசார், மயக்க நிலையில் இருந்த வர்த்திகாவை மீட்டு மருத்துவமனைக்கு கொண்டு சென்றனர், ஆனால் அவர் ஏற்கனவே இறந்துவிட்டதாக மருத்துவர்கள் உறுதி செய்தனர்.

இந்தத் தற்கொலைக்கு கடந்த சில மாதங்களாக அவர் அனுபவித்த மன உளைச்சலே காரணம் என்று கூறப்படுகிறது. கடந்த பிப்ரவரி மாதம், வர்த்திகா தனது சீனியர் மருத்துவர் ஒருவர் மீது தவறான முறையில் நடந்துகொண்டதாகப் புகார் அளித்திருந்தார். இது தொடர்பாக மருத்துவமனை நிர்வாகம் ஒரு விசாரணைக் குழுவை அமைத்து விசாரணை நடத்தியது, ஆனால் புகாரில் போதிய ஆதாரங்கள் இல்லை என முடிவானது. இதனால் மிகுந்த மன அழுத்தத்தில் இருந்த வர்த்திகா, விசாரணைக்குப் பிறகு பெரும் பாதிப்புக்குள்ளாகி இருந்ததாகத் தெரிகிறது. ஒரு இளம் மருத்துவர் பாலியல் அத்துமீறல் புகார் அளித்தும் நீதி கிடைக்காத விரக்தியில் இந்த முடிவை எடுத்துள்ளது மருத்துவ உலகையே சோகத்தில் ஆழ்த்தியுள்ளது.