“எடையை குறைக்க சித்திரவதை…” 6 வயது மகனை ட்ரெட்மில்லில் ஓட வைத்த தந்தை… கீழே விழுந்தும் கண்டுக்கல… நெஞ்சை உலுக்கும் பகீர் வீடியோ…!!

அமெரிக்காவின் நியூஜெர்சி மாநிலத்தில், 6 வயது மகனை உடல் எடையைக் குறைக்க வேண்டும் என்று கூறி ட்ரெட்மில்லில் ஓட வைத்துச் சித்திரவதை செய்து உயிரிழக்கச் செய்த கொடூரத் தந்தைக்கு நீதிமன்றம் 25 ஆண்டுகள் சிறை தண்டனை விதித்துள்ளது.

நியூஜெர்சி மாநிலம் பார்கட் பகுதியில் உள்ள உடற்பயிற்சிக் கூடத்தில் கிறிஸ்டோபர் கிரிகோர் என்பவர் தனது 6 வயது மகன் கோரி மைசியோலோவை உடற்பயிற்சி செய்ய வைத்துள்ளார். மகன் அதிக எடையுடன் இருப்பதாகக் கூறி, ட்ரெட்மில்லின் வேகத்தை அதிகரித்து ஓட வைத்துள்ளார். இதில் சிறுவன் நிலைதடுமாறித் திரும்பத் திரும்பக் கீழே விழுந்தபோதிலும், இரக்கமின்றி அவனை மீண்டும் மீண்டும் ட்ரெட்மில்லில் ஏற்றி ஓட வைத்துள்ளார். சில தருணங்களில் அச்சிறுவனின் தலையைக் கடிப்பது போன்ற கொடூரக் காட்சிகளும் அங்கிருந்த கண்காணிப்புக் கேமராவில் பதிவாகியிருந்தன.

இந்தச் சம்பவத்திற்குப் பிறகு உடல்நலக்குறைவு ஏற்பட்ட சிறுவன் கோரி, மருத்துவமனைக்குக் கொண்டு செல்லப்பட்டுச் சிகிச்சை பலனின்றிப் பரிதாபமாக உயிரிழந்தான். இதுதொடர்பாக நடைபெற்ற வழக்கில், நீதிமன்றத்தில் அந்தக் கொடூர வீடியோ திரையிடப்பட்டபோது சிறுவனின் தாய் கதறி அழுத காட்சி காண்போரைக் கண் கலங்கச் செய்தது. வழக்கை விசாரித்த நியூஜெர்சி பெருநகர நீதிமன்றம், மனிதநேயமற்ற முறையில் சிறுவனின் உயிரிழப்பிற்குக் காரணமாக இருந்த தந்தைக்கு 25 ஆண்டுகள் சிறை தண்டனை விதித்துத் தீர்ப்பளித்தது.