“என் மகனுக்கே வேலை இல்லைங்க..” கதறிய அடோப் நிறுவன இயக்குனர்.. லிங்க்டு-இன்னில் வைரலாகும் பகீர் பதிவு.. உறைந்துபோன நெட்டிசன்கள்..!!

உலகப்புகழ் பெற்ற போட்டோஷாப் உள்ளிட்ட பல்வேறு மல்டிமீடியா மென்பொருள்களை உருவாக்கும் முன்னணி நிறுவனமான அடோபியின் (Adobe) இயக்குநர் ஒருவரே, தனது மகனுக்கு வேலை கேட்டு லிங்க்டு-இன் (LinkedIn) சமூக வலைதளத்தில் கோரிக்கை வைத்திருக்கும் விசித்திரமான சம்பவம் தொழில்நுட்ப உலகில் பெரும் ஆச்சரியத்தையும் விவாதத்தையும் ஏற்படுத்தியுள்ளது. அடோபி நிறுவனத்தின் இயக்குநராகப் பணிபுரியும் சைலேஷ் மிஸ்ரா என்பவர்தான், வேலைச்சந்தையின் தற்போதைய கடுமையான சூழலால் ஒரு சாதாரண தந்தையாக மாறி பொதுவெளியில் இந்த உதவியைக் கோரியுள்ளார்.

சைலேஷ் மிஸ்ராவின் மகன் தாப்பர் கல்லூரியில் கணினி பொறியியல் படித்து முடித்தவர் ஆவார். அவருக்குக் கல்லூரி வளாக நேர்காணல் (Campus Interview) மூலம் ஒரு முன்னணி தொழில்நுட்ப நிறுவனத்தில் நல்ல வேலை கிடைத்து ஆஃபர் லெட்டரும் வழங்கப்பட்டிருந்தது. ஆனால், தற்போதைய பொருளாதார மந்தநிலை மற்றும் கார்ப்பரேட் நிறுவனங்களின் திடீர் கொள்கை மாற்றங்கள் காரணமாக, அந்த நிறுவனம் கடைசி நேரத்தில் மாணவர்களுக்கு வழங்கிய வேலை வாய்ப்பை ரத்து செய்து ஆஃபர் லெட்டர்களைத் திரும்பப் பெற்றுக்கொண்டது. கார்ப்பரேட் விதிகளின்படி தனது சொந்த நிறுவனத்திலேயே மகனுக்குப் பின்வாசல் வழியாக வேலை தர முடியாததால், சைலேஷ் மிஸ்ரா தனது நெட்வொர்க்கில் உள்ளவர்களிடம் பரிந்துரைகளை (Referrals) எதிர்பார்த்துப் பதிவிட்டுள்ளார்.

இப்பதிவு எக்ஸ் (ட்விட்டர்) தளத்தில் வைரலானதைத் தொடர்ந்து நெட்டிசன்கள் பலவிதமான கருத்துக்களைப் பகிர்ந்து வருகின்றனர். “பெரிய கார்ப்பரேட் நிறுவனங்கள் நினைத்தால் ஒப்பந்தங்களை எப்போது வேண்டுமானாலும் ரத்து செய்துவிடலாம் என்பதற்கு இதுவே சாட்சி” என்று தற்போதைய ஐடி வேலைச்சந்தையின் அவல நிலையைச் சிலர் சாடியுள்ளனர். அதேவேளையில், அடோபி போன்ற உலகளாவிய நிறுவனத்தில் உயர் பதவியில் இருந்தும், தனது செல்வாக்கைத் தவறாகப் பயன்படுத்தாமல் நேர்மையான வழியில் ஒரு சாதாரண இந்தியத் தந்தையைப் போலத் தன் மகனுக்கு வேலை தேடும் சைலேஷ் மிஸ்ராவின் நேர்மையை நெட்டிசன்கள் பலரும் வெகுவாகப் பாராட்டி வருகின்றனர்.