இனி GPay, PhonePe இருந்தா மட்டும் போதும்… பிஎஃப் ஆபிஸ் போகவே வேண்டாம்… ஏப்ரல் 1 முதல் அதிரடி மாற்றம்….!

வருங்கால வைப்பு நிதி (EPFO) சந்தாதாரர்களுக்கு மகிழ்ச்சியளிக்கும் வகையில், பிஎஃப் (PF) கணக்கிலிருந்து பணத்தை எடுக்கும் நடைமுறையை எளிதாக்க மத்திய அரசு புதிய திட்டத்தைக் கொண்டு வருகிறது. இதன்படி, வரும் ஏப்ரல் 1-ம் தேதி முதல் யுபிஐ (UPI) மூலமாகவே நேரடியாகப் பணத்தைப் பெற்றுக்கொள்ளும் வசதி அறிமுகம் செய்யப்பட உள்ளது. தற்போது பிஎஃப் பணத்தைப் பெற ஆன்லைனில் விண்ணப்பித்து நீண்ட காலம் காத்திருக்க வேண்டிய சூழல் உள்ள நிலையில், இந்த புதிய வசதி நடைமுறைக்கு வரும்போது உறுப்பினர்கள் தங்களது வங்கி கணக்குடன் இணைக்கப்பட்ட யுபிஐ ஐடி-ஐ பயன்படுத்தி மிக எளிதாகவும், விரைவாகவும் பணத்தை மாற்றிக்கொள்ள முடியும். இதற்காக தொழிலாளர் அமைச்சகம் தனது மென்பொருள் கட்டமைப்புகளை மேம்படுத்தும் பணிகளில் தீவிரமாக ஈடுபட்டுள்ளது.

இந்த அதிரடி மாற்றத்தால் சுமார் 8 கோடி பிஎஃப் சந்தாதாரர்கள் நேரடியாகப் பயனடைவார்கள் என்று எதிர்பார்க்கப்படுகிறது. தற்போது ஆண்டுதோறும் 5 கோடிக்கும் அதிகமான கோரிக்கைகளைத் தீர்வு காண்பதில் இபிஎஃப்ஓ (EPFO) அலுவலகத்திற்கு ஏற்படும் நிர்வாகச் சுமையைக் குறைக்கவே இந்த நேரடிப் பணப்பரிமாற்ற முறை உருவாக்கப்படுகிறது. இதன்படி, உறுப்பினர்கள் தங்களது பாதுகாப்புக்காக யுபிஐ பின் (UPI PIN) பயன்படுத்தி பணப் பரிமாற்றம் செய்யலாம். இந்த பணம் நேரடியாக வங்கி கணக்கிற்கு வந்தவுடன், அதனை டிஜிட்டல் முறையிலோ அல்லது ஏடிஎம் மூலமாகவோ எடுத்துக்கொள்ளலாம். வங்கிகளுக்கு இணையான டிஜிட்டல் சேவைகளை வழங்கும் நோக்கில் இந்த முக்கிய நடவடிக்கை எடுக்கப்பட்டுள்ளதாக அதிகாரிகள் தெரிவித்துள்ளனர்.