உஷார் மக்களே..! இபி பில் ஆன்லைனில் கட்ட முடியாது..! மின்சார வாரியத்தின் திடீர் அறிவிப்பு… காரணம் என்ன தெரியுமா..?

தமிழ்நாடு மின்பகிர்மான கழகத்தின் உயரழுத்த (HT) மின் நுகர்வோருக்கான பில்லிங் சேவை மற்றும் தரவுத்தள அமைப்பை மேம்படுத்தும் பணிகள் காரணமாக, மே 28ஆம் தேதி ஆன்லைன் மின் கட்டண சேவைகள் தற்காலிகமாக நிறுத்தப்படுவதாக மின்வாரியம் அறிவித்துள்ளது. தற்போதைய உயரழுத்த பில்லிங் தரவுத்தளம் மற்றும் சர்வர் அமைப்பானது நுகர்வோரின் பில் விவரங்கள், மீட்டர் ரீடிங் மற்றும் மொபைல் ஆப் சேவைகளுடன் ஒருங்கிணைந்து செயல்பட்டு வருகிறது. இந்த ஆன்லைன் சேவைகளை மேலும் பாதுகாப்பானதாகவும் வேகமானதாகவும் மாற்றுவதற்காக, பழைய சர்வரிலிருந்து புதிய மேம்பட்ட சர்வருக்கு தரவுகளை மாற்றும் பணிகள் மேற்கொள்ளப்படுகின்றன.

இந்த சர்வர் மேம்பாட்டுப் பணியில் ‘ஆரக்கிள் 19சி’ (Oracle 19c) போன்ற அதிநவீன தொழில்நுட்பங்கள் பயன்படுத்தப்பட உள்ளன. பொதுமக்கள் மற்றும் மின் நுகர்வோருக்குப் பெரிய அளவில் பாதிப்பு ஏற்படாத வண்ணம், அரசு விடுமுறை நாளான மே 28, வியாழக்கிழமை அன்று காலை 06:00 மணி முதல் இரவு 08:00 மணி வரை இம்மாற்றுப் பணிகள் மேற்கொள்ள திட்டமிடப்பட்டது. இந்த குறிப்பிட்ட நேர இடைவெளியில் உயரழுத்த பில்லிங் நுகர்வோர் போர்டல் (HT Billing Consumer Portal) தற்காலிகமாகச் செயல்படாது என்பதால், நுகர்வோர்களும் மின்வாரியக் கள அலுவலர்களும் இந்த இணையதள சேவைகளைப் பயன்படுத்த முடியாது.

இந்த தற்காலிகச் சேவை முடக்கம் காரணமாக உயரழுத்த மின் நுகர்வோர்கள் இன்று ஆன்லைனில் மின் கட்டணம் செலுத்துவதோ அல்லது மின் கட்டண விவரங்களை அறிவதோ இயலாது. எனவே, பொதுமக்கள் மற்றும் நுகர்வோர்கள் இந்த இக்கட்டான சூழ்நிலையைக் கருத்தில் கொண்டு, தங்களது மின்சாரம் சார்ந்த ஆன்லைன் பணிகளை முன்கூட்டியே திட்டமிட்டு முடித்துக் கொள்ளுமாறும், இந்த மேம்பாட்டுப் பணிக்கு முழு ஒத்துழைப்பு வழங்குமாறும் மின்வாரியம் கேட்டுக்கொண்டுள்ளது. இந்த நடவடிக்கை எதிர்காலத்தில் நுகர்வோருக்கு அதிவேக மற்றும் தடையற்ற சேவைகளை வழங்க உதவும் என்றும் தெரிவிக்கப்பட்டுள்ளது.