15 ரூபாய் ஆர்டர்… ஆனால் டிப்ஸ் எவ்வளவு தெரியுமா..? அக்கா நீ என் குலசாமி” பெண் வாடிக்கையாளரின் தாராள குணத்தால் கண்ணீர் விட்ட டெலிவரி ஊழியர்… நெஞ்சை உருக்கும் வீடியோ..

சமூக வலைத்தளங்களில் மனிதநேயத்தை உணர்த்தும் பல நெகிழ்ச்சியான வீடியோக்கள் வைரலாவது வழக்கம். அந்த வகையில், தற்போது இன்ஸ்டாகிராமில் ‘பிளிங்கிட்’ (Blinkit) நிறுவன ஆன்லைன் டெலிவரி ஊழியர் ஒருவர் பகிர்ந்த வீடியோ இணையவாசிகளின் இதயங்களை நெகிழச் செய்துள்ளது. வெறும் 15 ரூபாய் மதிப்புள்ள ஒரு சிறிய ஆர்டரை டெலிவரி செய்யச் சென்ற அந்த இளைஞருக்கு, வாடிக்கையாளர் பெண் ஒருவர் கொடுத்த இன்ப அதிர்ச்சிதான் இந்த வைரல் வீடியோவின் பின்னணி.

இன்ஸ்டாகிராமில் @im_blinkit_rider என்ற கணக்கில் பகிரப்பட்டுள்ள அந்த வீடியோவில், டெலிவரி ஊழியர் தனக்குக் கிடைத்த டிப்ஸை (Tip) மிகவும் நெகிழ்ச்சியோடு காட்டுகிறார். அதில் அவர், “நான் கொண்டு சென்றது வெறும் 15 ரூபாய் மதிப்புள்ள ஒரு சிறிய ஆர்டர் தான். ஆனால், அந்த அக்கா எனக்கு எவ்வளவு டிப்ஸ் கொடுத்தார் தெரியுமா? முழுமையாக 500 ரூபாய் கொடுத்திருக்கிறார்!” என்று கண்கலங்கியபடி கூறுகிறார். மேலும், “பொதுவாக என்னால் ஒரு நாளைக்குக் கூட இவ்வளவு சம்பாதிக்க முடியாது, மிக்க நன்றி அக்கா” என்று அந்தப் பெண்ணுக்குத் தனது நன்றியையும் மழலை மாறாத மகிழ்ச்சியையும் தெரிவித்துள்ளார்.

இந்த வீடியோ வைரலானதைத் தொடர்ந்து இணையவாசிகள் அந்தப் பெண்ணின் தாராள மனதையும், டெலிவரி ஊழியரின் வெள்ளந்தியான குணத்தையும் பாராட்டி வருகின்றனர். தங்களின் கருத்துகளில், “ஒரு சிறிய நற்செயல் மற்றொரு மனிதரின் முழு நாளையும் எவ்வளவு மகிழ்ச்சியாக மாற்றும் என்பதற்கு இதுவே சான்று” என்றும், வறுமையை நேரில் கண்டவர்களால் மட்டுமே அடுத்தவர்களின் தேவையை உணர்ந்து உதவ முடியும் என்றும் நெட்டிசன்கள் நெகிழ்ச்சியோடு பதிவிட்டு வருகின்றனர்.