“6 அமைச்சர்கள், 10 பதவி… ஆசை வார்த்தை காட்டிய ஆளும் கட்சி”…. எடப்பாடி போட்ட ‘பகீர்’ அறிக்கை…!

அனைத்திந்திய அண்ணா திராவிட முன்னேற்றக் கழகத்தின் பொதுச்செயலாளர் எடப்பாடி பழனிசாமி, கட்சியில் நிலவும் தற்போதைய அரசியல் சூழல் குறித்து ஒரு விரிவான விளக்க அறிக்கையை வெளியிட்டுள்ளார். அதில், 2026 சட்டமன்றத் தேர்தலில் அதிமுக 47 இடங்களிலும், அதன் கூட்டணிக் கட்சிகள் 6 இடங்களிலும் வெற்றி பெற்றிருந்தாலும், ஒருசில முன்னாள் அமைச்சர்கள் மற்றும் நிர்வாகிகள் பதவி ஆசைக்காகக் கட்சிக்குத் துரோகம் இழைத்துள்ளதாகக் குற்றம் சாட்டியுள்ளார். 6 அமைச்சர் பதவிகள் மற்றும் 10 வாரியத் தலைவர் பதவிகளுக்கு ஆசைப்பட்டு, கட்சியின் கொறடா உத்தரவை மீறி ஆளும் அரசுக்கு ஆதரவாகச் செயல்பட்டவர்களின் செயல் மன்னிக்க முடியாத மாபெரும் துரோகம் என்று அவர் சாடியுள்ளார்.

தன்னைப்பற்றி விமர்சனம் செய்பவர்களுக்குப் பதிலடி கொடுத்துள்ள அவர், தான் ஏசி அறையில் அமர்ந்து அரசியல் செய்வதாகக் கூறுவது முற்றிலும் உண்மைக்கு மாறானது என்று தெரிவித்துள்ளார். கடந்த ஆண்டு ஜூலை மாதம் முதல் தமிழகத்தின் 196 தொகுதிகளில் தான் ‘எழுச்சிப் பயணம்’ மேற்கொண்டு மக்களை நேரடியாகச் சந்தித்ததையும், தேர்தல் சமயத்தில் தமிழகம் முழுவதும் சூறாவளிப் பிரச்சாரம் செய்ததையும் அவர் சுட்டிக்காட்டியுள்ளார். எடப்பாடி தொகுதியில் தான் 8-வது முறையாகப் பெற்றுள்ள மிகப்பெரிய வெற்றி, மக்களின் நம்பிக்கைக்குச் சான்றாக இருப்பதாகவும் அவர் குறிப்பிட்டுள்ளார்.

அதிமுகவின் வரலாற்றை நினைவுகூர்ந்த எடப்பாடி பழனிசாமி, 1980 மற்றும் 1996 ஆகிய காலக்கட்டங்களில் கட்சி பின்னடைவைச் சந்தித்தபோதும், முக்கியத் தலைவர்கள் வெளியேறியபோதும், சாதாரணத் தொண்டர்களே இயக்கத்தைத் தாங்கிப் பிடித்தனர் என்று உணர்ச்சிப்பூர்வமாகக் கூறியுள்ளார். எம்.ஜி.ஆர் மற்றும் ஜெயலலிதா ஆகியோரின் வழியில் உருவான இந்த இயக்கம், ஒருசிலரின் சுயநலப் போக்கால் ஒருபோதும் அழிந்துவிடாது என்றும், வெற்றிகளும் தோல்விகளும் அரசியலில் சகஜமானவை என்றும் அவர் தொண்டர்களுக்குத் தைரியம் அளித்துள்ளார்.

இறுதியாக, பதவிக்காகக் கட்சி மாறியவர்களின் அவதூறுப் பிரச்சாரங்களை நம்ப வேண்டாம் என்றும், அடிமட்டத் தொண்டர்களுடன் தான் எப்போதும் பயணிக்கத் தயாராக இருப்பதாகவும் உறுதிபடக் கூறியுள்ளார். “எத்தனை நூற்றாண்டுகள் ஆனாலும் அதிமுக மக்களுக்காக இயங்கும்” என்ற மறைந்த முதல்வர் ஜெயலலிதாவின் வாக்கை மெய்ப்பிக்க எந்தத் தியாகத்திற்கும் தான் தயார் என்று குறிப்பிட்ட அவர், 2026-ல் இழந்த ஆட்சியை மீண்டும் மீட்டெடுக்க அனைத்து நிர்வாகிகளும், தொண்டர்களும் ஒற்றுமையுடன் உழைக்க வேண்டும் என அன்புடன் கேட்டுக்கொண்டுள்ளார்.