“பதவியை தூக்கி எறியுங்க”… முகத்துக்கு நேராக கொந்தளித்த நிர்வாகி… மேடையில் வெடித்த எடப்பாடி…. அதிமுகவில் பரபரப்பு….!

அதிமுக தலைமை அலுவலகத்தில் சட்டமன்றத் தேர்தல் தோல்வி குறித்து மாவட்ட வாரியாக நிர்வாகிகள் பங்கேற்கும் ஆலோசனைக் கூட்டம் கடந்த 15-ஆம் தேதி முதல் தொடங்கி நடைபெற்று வருகிறது. திருவள்ளூர், புதுக்கோட்டை, கரூர் உள்ளிட்ட பல மாவட்டத் தலைவர்களுடன் முதற்கட்ட பேச்சுவார்த்தை முடிந்த நிலையில், இடைவெளிக்குப் பிறகு மீண்டும் இன்று தொடங்கி தொடர்ந்து 5 நாட்களுக்கு ஆலோசனைக் கூட்டம் நடைபெற உள்ளது. இன்று மதுரை, ராமநாதபுரம் மாவட்ட நிர்வாகிகள் பங்கேற்ற நிலையில், வரும் நாட்களில் கோவை, திருப்பூர், சென்னை, சேலம் உள்ளிட்ட பிற மாவட்ட நிர்வாகிகளுடனும் எடப்பாடி பழனிசாமி ஆலோசனை நடத்தத் திட்டமிட்டுள்ளார்.

இன்றைய கூட்டத்தில் மதுரை பகுதிச் செயலாளர் கந்தன், தேர்தலில் கட்சி அடைந்த தோல்விக்கு பொறுப்பேற்று எடப்பாடி பழனிசாமி பொதுச் செயலாளர் பதவியிலிருந்து விலக வேண்டும் என நேரடியாகக் வலியுறுத்தினார். இதனால் கூட்ட அரங்கில் பெரும் சலசலப்பும் பதற்றமும் உருவானது. நிர்வாகியின் இந்தப் பேச்சைக் கேட்டு கடும் கோபமடைந்த எடப்பாடி பழனிசாமி, உடனடியாக குறுக்கிட்டுத் தனது அதிருப்தியை வெளிப்படுத்தினார்.

“நான் ஏன் பொதுச் செயலாளர் பதவியிலிருந்து விலக வேண்டும்? இந்த கடுமையான சூழலிலும் 47 தொகுதிகளில் அதிமுகவை வெற்றி பெற வைத்துள்ளேன்” என்று எடப்பாடி பழனிசாமி ஆவேசமாகக் கேள்வி எழுப்பியதாகத் தகவல்கள் வெளியாகியுள்ளன. தோல்விக்கான காரணங்களைக் கண்டறிந்து கட்சியை பலப்படுத்தவே இந்த ஆலோசனைக் கூட்டம் நடத்தப்பட்டு வரும் நிலையில், தலைவரின் இந்த காரசாரமான பதிலடி அதிமுக வட்டாரத்தில் பெரும் பரபரப்பை ஏற்படுத்தியுள்ளது.