சீருடைக்கே பயமில்லையா?… போதை ஆசாமிகளின் வெறிச்செயல்… நடுரோட்டில் காவலர்கள் சரமாரியாக தாக்குதல்… உச்சக்கட்ட கொந்தளிப்பு…!!

அரியலூர் மாவட்டம் செந்துறை அருகே, நள்ளிரவில் ரோந்துப் பணியில் ஈடுபட்டிருந்த காவலர்கள் மீது மூன்று பேர் கொண்ட கும்பல் தாக்குதல் நடத்திய சம்பவம் பெரும் அதிர்ச்சியை ஏற்படுத்தியுள்ளது. தளவாய் காவல் நிலையத்தில் பணியாற்றும் காவலர் ராஜகண்ணன் மற்றும் ஊர்க்காவல் படை வீரர் வெங்கடேசன் ஆகிய இருவரும் ரோந்து சென்றபோது, சிலுப்பனூர் பகுதியில் மூன்று இளைஞர்கள் மது அருந்திக் கொண்டிருந்ததைப் பார்த்துள்ளனர். இதையடுத்து, நள்ளிரவு நேரத்தில் இவ்வாறு மது அருந்துவது தவறு எனக் கூறி அவர்களை எச்சரித்துள்ளனர்.

இதனைத் தொடர்ந்து, அதிகாலை நேரத்திலும் அதே நபர்கள் மீண்டும் மது அருந்திக் கொண்டிருந்ததைக் கண்ட காவலர்கள், அங்கிருந்து செல்லுமாறு அறிவுறுத்தியுள்ளனர். அப்போது ஏற்பட்ட வாக்குவாதம் முற்றிய நிலையில், ஆத்திரமடைந்த மூன்று பேரும் காவலர்களை சரமாரியாகத் தாக்கியுள்ளனர். இதில் வெங்கடேசன் பலத்த காயமடைந்து மயங்கி விழுந்ததாகக் கூறப்படுகிறது. காவலர் ராஜகண்ணனுக்கும் காயங்கள் ஏற்பட்டுள்ளன. தகவலறிந்து சம்பவ இடத்திற்கு வந்த சக காவலர்கள் இருவரையும் மீட்டு மருத்துவமனைக்கு அனுப்பி வைத்தனர்.

இதில் வெங்கடேசனின் உடல்நிலை கவலைக்கிடமாக இருந்ததால், மேல் சிகிச்சைக்காக திருச்சியில் உள்ள தனியார் மருத்துவமனைக்கு மாற்றப்பட்டுள்ளார். இந்தத் தாக்குதல் சம்பவம் தொடர்பாக சிலுப்பனூர் கிராமத்தைச் சேர்ந்த மதிவாணன், தாமரைக்கண்ணன், இளம்பரிதி ஆகிய மூன்று இளைஞர்களையும் போலீசார் கைது செய்து விசாரணை நடத்தி வருகின்றனர். மேலும், அவர்களிடமிருந்து இரண்டு இருசக்கர வாகனங்களும் பறிமுதல் செய்யப்பட்டுள்ளன. ரோந்துப் பணியில் இருந்த காவலர்களுக்கே தாக்குதல் நடத்தப்பட்ட சம்பவம் அப்பகுதியில் பரபரப்பை ஏற்படுத்தியுள்ளது.