பகீர் திருப்பம்..! குழந்தை சாவுக்கு தோசை மாவு காரணம் அல்ல… 200 பேர் வாங்கிய மாவு, ஒரு குடும்பம் மட்டும் பாதிப்பு எப்படி..? விசாரணையில் திடுக்கிடும் தகவல்கள்..!!

அகமதாபாத்தின் சந்கேடா பகுதியில் தோசை மாவு சாப்பிட்டதால் ஏற்பட்டதாகக் கருதப்பட்ட உணவு நச்சு (Food Poisoning) விவகாரம், தற்போது பெரும் மர்மமாக மாறியுள்ளது. இந்தச் சம்பவத்தில் 3 மாதக் குழந்தை ரஹாவும், 3 வயது சிறுமி மிஷ்டியும் உயிரிழந்த நிலையில், அவர்களின் பெற்றோர் விமல் பிரஜாபதி மற்றும் பவானா ஆகியோர் மருத்துவமனையில் சிகிச்சை பெற்று வருகின்றனர். தாய்ப்பால் மட்டுமே குடித்த 3 மாதக் குழந்தை இவ்வளவு சீக்கிரம் உயிரிழந்தது தடயவியல் நிபுணர்களிடையே பெரும் சந்தேகத்தை ஏற்படுத்தியுள்ளது.

காவல்துறையினரின் முதற்கட்ட விசாரணையில், அதே கடையில் தோசை மாவு வாங்கிய சுமார் 200-க்கும் மேற்பட்டோருக்கு எந்தப் பாதிப்பும் ஏற்படவில்லை என்பது தெரியவந்துள்ளது. மேலும், முதல் குழந்தையின் இறப்பை அமைதியாக மறைத்து அடக்கம் செய்த பெற்றோர், இரண்டாவது குழந்தை இறந்த பிறகு தாமதமாகப் போலீசாருக்குத் தகவல் தெரிவித்தது சந்தேகத்தை வலுப்படுத்தியுள்ளது. இதனால் இது தற்கொலை முயற்சியோ அல்லது திட்டமிட்ட கொலையோ என்ற கோணத்தில் போலீசார் விசாரணையை முடுக்கிவிட்டுள்ளனர்.

இந்த மர்மத்தைத் துலக்க, ஏற்கனவே அடக்கம் செய்யப்பட்ட 3 மாதக் குழந்தை ரஹாவின் உடல் தோண்டி எடுக்கப்பட்டு, தடயவியல் நிபுணர்களின் முன்னிலையில் பிரேதப் பரிசோதனைக்கு அனுப்பப்பட்டுள்ளது. உணவில் நச்சு இருந்ததா அல்லது வேறு ஏதேனும் நச்சுப் பொருள் வேண்டுமென்றே கொடுக்கப்பட்டதா என்பது குறித்த தடய அறிவியல் ஆய்வகத்தின் (FSL) அறிக்கைக்காகப் போலீசார் காத்திருக்கின்றனர். உண்மை விரைவில் வெளிவரும் என எதிர்பார்க்கப்படுகிறது.