ஈரான் கேட்ட அந்த ஒரு விஷயம்… அதிர்ந்து போன அமெரிக்கா…! எடுபடுமா 15 அம்ச திட்டம்…? மத்திய கிழக்கில் மாபெரும் மாற்றம்..!!!

மத்திய கிழக்கில் நிலவி வரும் போர்ச் சூழலை முடிவுக்குக் கொண்டு வர, அமெரிக்க அதிபர் டொனால்ட் டிரம்ப் 15 அம்ச போர்நிறுத்தத் திட்டத்தை பாகிஸ்தான் தூதர்கள் வழியாக ஈரானிடம் சமர்ப்பித்துள்ளார். இந்தத் திட்டத்தின்படி, ஈரான் தனது அணுசக்தித் திட்டங்களைக் கைவிட வேண்டும், ஏவுகணை சோதனைகளைக் கட்டுப்படுத்த வேண்டும் மற்றும் ஹார்முஸ் ஜலசந்தியை மீண்டும் திறக்க வேண்டும் போன்ற கடுமையான நிபந்தனைகள் விதிக்கப்பட்டுள்ளன.

இதற்குப் பிரதிபலனாக, ஈரான் மீதான பொருளாதாரத் தடைகளை நீக்கவும், ஆக்கப்பூர்வமான அணுசக்தித் தேவைகளுக்கு உதவவும் அமெரிக்கா முன்வந்துள்ளது. இருப்பினும், இந்தப் பேச்சுவார்த்தைகள் எதையும் ஈரான் அதிகாரப்பூர்வமாக ஏற்கவில்லை என்பதோடு, அமெரிக்கா “தன்னுடன் தானே பேசிக்கொள்கிறது” என ஈரான் ராணுவம் கிண்டல் செய்துள்ளது.

மேலும் மறுபுறம், ஈரான் தரப்பிலிருந்தும் 10 முக்கிய நிபந்தனைகள் முன்வைக்கப்பட்டுள்ளதாகத் தகவல்கள் தெரிவிக்கின்றன. வளைகுடா பிராந்தியத்தில் உள்ள அமெரிக்க ராணுவத் தளங்களை மூட வேண்டும், அனைத்துத் தடைகளையும் முழுமையாக நீக்க வேண்டும் மற்றும் லெபனானில் ஹிஸ்புல்லா அமைப்பிற்கு எதிரான இஸ்ரேலின் தாக்குதல்களை நிறுத்த வேண்டும் என்பதே ஈரானின் முதன்மையான கோரிக்கைகளாக உள்ளன.

இந்நிலையில் இரு நாடுகளும் தத்தமது நிபந்தனைகளில் உறுதியாக இருப்பதால், அமைதிப் பேச்சுவார்த்தை ஒரு சிக்கலான நிலையில் உள்ளது. இதற்கிடையில், மத்திய கிழக்கில் அமெரிக்கா தனது கூடுதல் படைகளைக் குவித்து வருவது இப்பிராந்தியத்தில் பதற்றத்தை மேலும் அதிகரித்துள்ளது.