“3 சீட், உதயசூரியன் சின்னத்தில் போட்டி”… திமுகவுடன் ராமதாஸ் ரகசிய டீலிங்.. பரபரக்கும் அறிவாலயம்…!

2026 தமிழக சட்டமன்றத் தேர்தலை முன்னிட்டு தமிழக அரசியல் களம் இப்போதே சூடுபிடிக்கத் தொடங்கியுள்ளது. குறிப்பாக, பாட்டாளி மக்கள் கட்சியில் தந்தை ராமதாஸுக்கும், மகன் அன்புமணி ராமதாஸுக்கும் இடையே ஏற்பட்டுள்ள அரசியல் மோதல் பெரும் பரபரப்பை ஏற்படுத்தியுள்ளது. தேர்தல் ஆணையத்தின் அங்கீகாரப்படி அன்புமணி தரப்பு அதிமுகவுடன் கூட்டணி பேச்சுவார்த்தையை முன்னெடுத்து வரும் நிலையில், கட்சியின் நிறுவனரான ராமதாஸ் திமுகவுடன் ரகசியமாக பேச்சுவார்த்தை நடத்தி வருவதாகத் தகவல்கள் வெளியாகியுள்ளன.

திமுக தரப்பில் செல்வாக்குமிக்க அமைச்சர் ஒருவர் மூலம் நடத்தப்பட்ட முதற்கட்ட பேச்சுவார்த்தையில், ராமதாஸ் தரப்புக்கு 3 தொகுதிகள் ஒதுக்க முன்வந்துள்ளதாகக் கூறப்படுகிறது. இந்தத் தொகுதிகளில் ராமதாஸின் மகள் ஸ்ரீகாந்தி, கட்சியின் மூத்த நிர்வாகி ஜி.கே. மணி மற்றும் அருள் ஆகியோர் போட்டியிட வாய்ப்புள்ளதாகத் தெரிகிறது. ஆனால், இந்த முறை பாமகவின் தனிச் சின்னத்தில் போட்டியிட அனுமதி வழங்காமல், ‘உதயசூரியன்’ சின்னத்திலேயே போட்டியிட வேண்டும் என்ற கடும் நிபந்தனையை திமுக விதித்துள்ளதாகக் கசிந்துள்ள தகவல்கள் அரசியல் வட்டாரத்தில் சலசலப்பை ஏற்படுத்தியுள்ளன.

மறுபுறம், அன்புமணி ராமதாஸ் தலைமையில் ஒரு பிரிவு அதிமுகவுடன் கைகோர்த்துள்ள நிலையில், ராமதாஸின் இந்த அதிரடி நகர்வு பாமக தொண்டர்களிடையே குழப்பத்தை ஏற்படுத்தியுள்ளது. திமுக – பாமக கூட்டணி உருவானால், அது தற்போதைய கூட்டணியில் உள்ள விடுதலை சிறுத்தைகள் போன்ற கட்சிகளின் நிலைப்பாட்டில் எந்த மாதிரியான மாற்றத்தை ஏற்படுத்தும் என்ற கேள்வியும் எழுந்துள்ளது. குடும்பத்திற்குள் ஏற்பட்டுள்ள இந்த அதிகாரப் போட்டி, வரவிருக்கும் தேர்தலில் வன்னியர் சமூக வாக்குகளைப் பிரிக்குமா அல்லது ஒரு புதிய அரசியல் கணக்கைத் தொடங்குமா என்பதைப் பொறுத்திருந்துதான் பார்க்க வேண்டும்.