“அங்க சீட் கொடுத்தா ஓகே”…. திமுகவா? அதிமுகவா?…. இரவோடு இரவாக தோப்பு வெங்கடாசலம் எடுத்த முடிவு…. அலறும் அரசியல் களம்….!

கொங்கு மண்டலத்தின் முக்கியத் தொகுதியான பெருந்துறையில், வரவிருக்கும் தேர்தல் களம் தற்போதே சூடுபிடிக்கத் தொடங்கியுள்ளது. முன்னாள் அமைச்சரான தோப்பு வெங்கடாசலம், கடந்த முறை அதிமுகவில் சீட் கிடைக்காததால் சுயேச்சையாகப் போட்டியிட்டு 35,000-க்கும் அதிகமான வாக்குகளைப் பெற்றுத் தனது செல்வாக்கை நிரூபித்தார். இருப்பினும், அதிமுகவின் ஜெயக்குமாரிடம் 9,693 வாக்குகள் வித்தியாசத்தில் மட்டுமே அவர் தோல்வியடைந்தார். இதுவரை ஒருமுறை கூட பெருந்துறை தொகுதியைக் கைப்பற்றாத திமுக, இந்த முறை தனது வரலாற்றை மாற்றி எழுதத் திட்டமிட்டுள்ளது. அதற்காக, கட்சியில் இருந்து விலகிய தோப்பு வெங்கடாசலத்தை மீண்டும் திமுகவில் இணைத்து, அவரை பெருந்துறை தொகுதியின் வேட்பாளராகக் களமிறக்க அக்கட்சியின் தலைமை தீவிர ஆலோசனையில் ஈடுபட்டுள்ளதாகக் கூறப்படுகிறது.

அதேவேளையில், தனது அரசியல் அடித்தளமான பெருந்துறையை மீண்டும் கைப்பற்றுவதில் தோப்பு வெங்கடாசலமும் உறுதியான முடிவில் இருக்கிறார். திமுகவின் தூது ஒருபுறம் இருக்க, அதிமுகவின் கோட்டையாக விளங்கும் பெருந்துறையில் மீண்டும் தனக்குப் போட்டியிட வாய்ப்பு (சீட்) அளிக்கப்பட்டால், அதிமுகவின் பக்கமே மீண்டும் சாயலாம் என்ற எண்ணத்திலும் அவர் இருப்பதாகத் தகவல்கள் தெரிவிக்கின்றன. பெருந்துறையில் இதுவரை வெற்றி கணக்கைத் தொடங்காத திமுகவும், தனது பாரம்பரியக் கோட்டையைத் தக்கவைத்துக்கொள்ளத் துடிக்கும் அதிமுகவும் எடுக்கும் அடுத்தகட்ட நகர்வுகளைப் பொறுத்தே, தோப்பு வெங்கடாசலத்தின் இந்த அரசியல் திருப்பம் யாருக்குச் சாதகமாக அமையும் என்பது தெரியவரும்.