2026-க்கு ‘ஸ்கெட்ச்’ போட்ட ஸ்டாலின்… களத்தில் இறங்கும் 70,000 பெண்கள்…. திரளும் 10 லட்சம் பட்டாளம்…. அதிரும் அரசியல் களம்…!

சென்னை அண்ணா அறிவாலயத்தில் முதலமைச்சர் மு.க. ஸ்டாலின் தலைமையில் நடைபெற்ற திமுக மாவட்டச் செயலாளர்கள் கூட்டத்தில், வரவிருக்கும் சட்டமன்றத் தேர்தலை எதிர்கொள்வது குறித்து முக்கிய ஆலோசனைகள் மேற்கொள்ளப்பட்டு நான்கு அதிரடி தீர்மானங்கள் நிறைவேற்றப்பட்டுள்ளன. தேர்தல் நெருங்கி வரும் சூழலில், அமைச்சர்கள், நாடாளுமன்ற மற்றும் சட்டமன்ற உறுப்பினர்கள் பங்கேற்ற இக்கூட்டத்தில், கட்சியின் தேர்தல் வியூகங்கள் மற்றும் களப்பணிகள் குறித்து நிர்வாகிகளுக்கு முதலமைச்சர் பல்வேறு அறிவுறுத்தல்களை வழங்கினார்.

இந்தக் கூட்டத்தின் முக்கிய முடிவாக, மார்ச் 8-ம் தேதி திருச்சியில் ‘ஸ்டாலின் தொடரட்டும் தமிழகம் வெல்லட்டும்’ என்ற பெயரில் 10 லட்சம் பேர் பங்கேற்கும் பிரம்மாண்ட மாநில மாநாட்டை நடத்த தீர்மானிக்கப்பட்டுள்ளது. மேலும், பிப்ரவரி 1 முதல் மார்ச் 8 வரை திமுக மகளிர் அணியினர் ‘வெல்லும் தமிழ் பெண்கள்’ என்ற பெயரில் வீடு வீடாகச் சென்று தமிழக அரசின் சாதனைகளை விளக்கி பரப்புரை செய்யவும், ஒவ்வொரு வாக்குச்சாவடிக்கும் 10 பெண்கள் வீதம் இந்தப் பணியில் ஈடுபடவும் முடிவெடுக்கப்பட்டுள்ளது.

அரசியல் களத்தில் அதிர்வலைகளை ஏற்படுத்தும் வகையில், ‘தமிழ்நாடு தலைகுனியாது’ என்ற தலைப்பில் ஒவ்வொரு தொகுதிக்கும் நான்கு இடங்களில் நட்சத்திரப் பேச்சாளர்களைக் கொண்டு பொதுக்கூட்டங்களை நடத்தவும் இக்கூட்டத்தில் தீர்மானம் நிறைவேற்றப்பட்டது. தேர்தல் கூட்டணி மற்றும் தொகுதி நிலவரங்கள் குறித்தும் விவாதிக்கப்பட்ட இக்கூட்டம், திமுக தொண்டர்களிடையே தேர்தல் உற்சாகத்தை ஏற்படுத்தும் வகையில் அமைந்துள்ளதாகக் கருதப்படுகிறது.