“எங்களுக்கு இது போதும்”… 6 மாதங்களுக்கு முன்பே ஸ்டாலின் போட்ட ரகசிய டீல்?… செல்வப்பெருந்தகை சொன்ன சீக்ரெட்…!

தமிழகச் சட்டமன்றத் தேர்தல் நெருங்கி வரும் சூழலில், திமுக தலைமையிலான கூட்டணியில் தொகுதிப் பங்கீடு குறித்த எதிர்பார்ப்புகள் அதிகரித்துள்ளன. இந்நிலையில், காங்கிரஸ் கட்சிக்கு கடந்த தேர்தலை விட ஒரு தொகுதி கூட குறைக்கப்படாது என்று தமிழக முதல்வர் மு.க. ஸ்டாலின் தமக்கு உறுதி அளித்துள்ளதாகத் தமிழக காங்கிரஸ் கமிட்டித் தலைவர் செல்வப்பெருந்தகை தெரிவித்துள்ளார். ஆறு மாதங்களுக்கு முன்பே கடலூர் மாவட்டப் பயணத்தின் போது முதல்வர் இந்த வாக்குறுதியை அளித்ததாக அவர் குறிப்பிட்டுள்ளார்.

திமுக மற்றும் காங்கிரஸ் இடையிலான இணக்கமான உறவைச் சிதைக்க பாஜக பல்வேறு சதித்திட்டங்களைத் தீட்டி வருவதாக செல்வப்பெருந்தகை குற்றம்சாட்டியுள்ளார். குறிப்பாக, சிறுபான்மையினர் மற்றும் தலித் மக்களின் வாக்குகளைப் பிரிப்பதன் மூலம் தமிழகத்தில் கால்பதிக்க பாஜக முயல்வதாகவும், ஆனால் மதவாத சக்திகள் தமிழகத்தை ஆதிக்கம் செலுத்த ஒருபோதும் அனுமதிக்க மாட்டோம் என்றும் அவர் திட்டவட்டமாகத் தெரிவித்துள்ளார்.

கூட்டணிப் பேச்சுவார்த்தைகள் குறித்துப் பேசிய அவர், திமுக சார்பில் பேச்சுவார்த்தைக் குழுவை விரைவில் அமைக்க வேண்டும் என்று வலியுறுத்தியுள்ளதாகக் கூறினார். அடுத்த ஒரு வாரத்திற்குள் தொகுதிப் பங்கீடு பணிகளை முடிக்க வேண்டும் என்பதே காங்கிரஸின் விருப்பமாக உள்ளது. தமிழகத்தில் இந்தியா கூட்டணி மிகவும் வலுவாக இருப்பதாகவும், மற்ற மாநிலங்களைப் போல இங்கு பிரிவினைக்கு இடமில்லை என்றும் அவர் நம்பிக்கை தெரிவித்தார்.

தமிழக வெற்றிக் கழகம் (தவெக) போன்ற புதிய கட்சிகளின் வரவு மற்றும் ஆட்சியில் பங்கு போன்ற கோரிக்கைகளால் கூட்டணிக்குள் சலசலப்புகள் நிலவுவதாகக் கூறப்பட்ட நிலையில், செல்வப்பெருந்தகையின் இந்த விளக்கம் முக்கியத்துவம் பெறுகிறது. இதன் மூலம் திமுக – காங்கிரஸ் கூட்டணி உறுதியாகத் தொடர்வதும், தொகுதிப் பங்கீட்டில் சுமூகமான முடிவு எட்டப்படும் என்பதும் தெளிவாகியுள்ளது.