“ஆட்சியில் பங்கு… 41 சீட்டில் பிடிவாதம்”…. திமுகவை மிரட்டும் காங்கிரஸ்.. அண்ணா அறிவாலயத்தில் நடந்த நள்ளிரவு மீட்டிங்…!

தமிழக சட்டமன்றத் தேர்தல் நெருங்கி வரும் சூழலில், திமுக கூட்டணியில் தொகுதிப் பங்கீடு தொடர்பாக நிலவும் சலசலப்புகள் அரசியல் களத்தில் பரபரப்பை ஏற்படுத்தியுள்ளன. குறிப்பாக, காங்கிரஸ் கட்சி 41 தொகுதிகள், ஆட்சியில் பங்கு மற்றும் ராஜ்யசபா இடங்கள் என அதிகப்படியான கோரிக்கைகளை முன்வைப்பது திமுக தலைமைக்கு கடும் அதிருப்தியை ஏற்படுத்தியுள்ளது. கடந்த நாடாளுமன்றத் தேர்தலில் காங்கிரஸை விட பாஜக அதிக வாக்கு சதவீதத்தைப் பெற்றது அக்கட்சிக்கு அதிர்ச்சியைத் தந்துள்ள நிலையில், தங்களின் வளர்ச்சியை உறுதிப்படுத்தவே இத்தகைய பிடிவாதம் காட்டுவதாக காங்கிரஸ் தரப்பு கூறுகிறது.

இந்தச் சிக்கலான சூழலில், தமிழக முதல்வர் மு.க. ஸ்டாலின் கடந்த சில தினங்களுக்கு முன்பு மூத்த அமைச்சர்களுடன் அவசர ஆலோசனை நடத்தியதாகத் தகவல்கள் வெளியாகியுள்ளன. கூட்டணிக் கட்சிகள் ஒவ்வொன்றாகக் கூடுதல் தொகுதிகளைக் கேட்டு அழுத்தம் கொடுப்பது திமுகவிற்கு பெரும் தலைவலியை ஏற்படுத்தியுள்ள நிலையில், குறிப்பாகக் காங்கிரஸ் கட்சியின் செயல்பாடுகள் குறித்து இந்த கூட்டத்தில் விரிவாக விவாதிக்கப்பட்டுள்ளது. பேச்சுவார்த்தையில் தாமதம் ஏற்படுவதால், அகில இந்திய காங்கிரஸ் பொதுச்செயலாளர் கே.சி. வேணுகோபாலின் சென்னை வருகையும் தள்ளிப்போய்க்கொண்டே இருக்கிறது.

அமைச்சர்களுடனான ஆலோசனையின் போது, தேவையற்ற குழப்பங்களை ஏற்படுத்தும் காங்கிரஸ் கட்சியை கூட்டணியிலிருந்து கழற்றிவிடலாம் என்று ஒரு தரப்பினர் கருத்து தெரிவித்துள்ளனர். எனினும், இதற்குப் பதிலளித்த முதல்வர் ஸ்டாலின், காங்கிரஸ் உடனான கூட்டணி என்பது மறைந்த தலைவர் கருணாநிதியால் உருவாக்கப்பட்டது என்பதால், நாமாக அவர்களை வெளியேற்ற வேண்டாம் என்று அறிவுறுத்தியதாகக் கூறப்படுகிறது. ஒருவேளை காங்கிரஸ் அவர்களாகவே கூட்டணியை விட்டு வெளியேறினால், அவர்களுக்கு ஒதுக்கப்படும் தொகுதிகளை மற்ற கூட்டணிக் கட்சிகளுக்குப் பகிர்ந்து அளிக்கலாம் என்பதே முதல்வரின் திட்டமாக இருப்பதாகத் தெரிகிறது.

புதுச்சேரி விவகாரம் மற்றும் மாணிக்கம் தாகூர் போன்ற காங்கிரஸ் தலைவர்களின் வெளிப்படையான விமர்சனங்கள் திமுகவினரிடையே கடும் கோபத்தை உருவாக்கியுள்ளன. ஏற்கனவே திமுகவின் அடிமட்டத் தொண்டர்கள் மத்தியில் காங்கிரஸை ஒரு “எக்ஸ்ட்ரா லக்கேஜ்” ஆகப் பார்க்கும் போக்கு அதிகரித்துள்ள நிலையில், வரும் நாட்களில் தொகுதிப் பங்கீடு பேச்சுவார்த்தை எந்த மாதிரியான திருப்பத்தை எடுக்கும் என்பது பெரும் எதிர்பார்ப்பை ஏற்படுத்தியுள்ளது. கூட்டணியின் ஒற்றுமையைக் காப்பதா அல்லது இடப் பங்கீட்டில் உறுதி காட்டுவதா என்பதில் திமுக தலைமை இப்போது தீவிரமாக ஆலோசித்து வருகிறது.