“திமுக ஆட்சிதான் பெஸ்ட்”…. பிரச்சாரக் களத்தில் அதிர்ச்சி கொடுத்த எடப்பாடி பழனிசாமி… இப்படி ஒரு டுவிஸ்ட்டை யாரும் எதிர்பார்க்கலையே….!

மதுராந்தகம் மற்றும் தாராபுரம் இடைத்தேர்தல் களம் தவெக, திமுக, அதிமுக, கம்யூனிஸ்ட்கள், நாம் தமிழர் என ஐந்து முனைப் போட்டியால் தற்போதே சூடுபிடிக்கத் தொடங்கியுள்ளது. தேர்தல் பிரச்சாரத்தில் தீவிரமாக ஈடுபட்டு வரும் அதிமுக பொதுச் செயலாளர் எடப்பாடி பழனிசாமி, மதுராந்தகத்தில் நடைபெற்ற கூட்டத்தில் உரையாற்றினார். அப்போது, அதிமுக மட்டுமன்றி திமுக ஆட்சியிலும் கூட நல்ல நிர்வாகம் வழங்கப்பட்டதாகக் கூறி, முன்னாள் முதல்வர் கருணாநிதியின் பெயரைக் குறிப்பிட்டு ஆச்சரியப்பட வைக்கும் வகையில் பாராட்டிப் பேசினார்.

ஒரு அரசாங்கம் திறம்படச் செயல்படுவதற்கு, பல ஆண்டுகள் நிர்வாக அனுபவம் வாய்ந்த ஓய்வுபெற்ற தலைமைச் செயலாளர்கள் அல்லது துறைச் செயலாளர்களையே ஆலோசகர்களாக நியமிப்பது மரபு என்று அவர் சுட்டிக்காட்டினார். அத்தகைய அதிகாரிகளுக்கு அரசு நிர்வாகத்தின் நுணுக்கங்கள் தெரிந்திருக்கும் என்பதால், அவர்களது ஆலோசனையின் பேரில் மக்களுக்கான திட்டங்கள் சிறப்பாகச் சென்றடையும் என்றார். கருணாநிதி, எம்.ஜி.ஆர், ஜெயலலிதா மற்றும் தமது ஆட்சிக்காலங்களில் இத்தகைய திறமையான அதிகாரிகளே நியமிக்கப்பட்டதால் தான் நல்லாட்சி வழங்க முடிந்ததாக எடப்பாடி பழனிசாமி விளக்கமளித்தார்.

தற்போதைய தவெக அரசை கடுமையாக விமர்சித்த அவர், அனுபவம் வாய்ந்த அதிகாரிகளுக்குப் பதிலாக ஜோதிடர்களையும் தேர்தல் வியூக வகுப்பாளர்களையும் அரசு ஆலோசகர்களாக நியமித்திருப்பதாகக் குற்றம் சாட்டினார். தேர்தல் வியூக வகுப்பாளர்களான ஜான் ஆரோக்கியசாமி, விஷ்ணு ரெட்டி போன்றோரை நியமித்து நடத்தும் அரசால் மக்களுக்கு எப்படிச் சிறந்த திட்டங்களை வழங்க முடியும் என்று கேள்வியெழுப்பினார். நிர்வாக அனுபவம் இல்லாதவர்களை வைத்துக் கொண்டு அரசு நடத்துவது நாட்டின் வளர்ச்சிக்கு உகந்தது அல்ல என்றும் அவர் சாடினார்.

மேலும், தவெக அரசு தொடர்பான பிற விவகாரங்களையும் விமர்சித்த எடப்பாடி பழனிசாமி, தோல்வியடைந்த திரைப்படத் தயாரிப்பாளரை டெல்லி சிறப்பு பிரதிநிதியாக நியமித்திருப்பதைக் கேலி செய்தார். ‘ஜனநாயகன்’ திரைப்படத் தயாரிப்பாளரைத் டெல்லியில் தமிழகத்தின் பாலமாகச் செயல்பட நியமித்திருப்பதைச் சுட்டிக்காட்டிய அவர், இதே நிலை நீடித்தால் நாளையே தனது ‘மேக் அப் மேன்’ என்பவருக்கும் விஜய் அரசுப் பதவி வழங்கினாலும் ஆச்சரியப்படுவதற்கில்லை எனத் தீவிரமாக விமர்சித்தார்.