விஜயகாந்த் பாணியில் அதிரடி…. பிரேமலதா கையில் இருக்கும் அந்த ‘சஸ்பென்ஸ்’ லிஸ்ட்… ஆடிப்போன அறிவாலயமும் எடப்பாடியும்….!

தேமுதிக பொதுச்செயலாளர் பிரேமலதா விஜயகாந்த், வரவிருக்கும் 2026 தமிழக சட்டமன்றத் தேர்தலுக்கான கூட்டணி முடிவை அறிவிப்பதில் காட்டி வரும் நிதானம், தமிழக அரசியலில் பெரும் பரபரப்பை ஏற்படுத்தியுள்ளது. கடலூர் மாநாட்டிலேயே கூட்டணி குறித்த அறிவிப்பு வெளியாகும் என்று எதிர்பார்க்கப்பட்ட நிலையில், எவ்வித அறிவிப்பும் இன்றி மாநாடு முடிந்தது. தற்போது திமுக மற்றும் அதிமுக ஆகிய இரு பிரதான கட்சிகளுமே தேமுதிகவைத் தங்கள் பக்கம் இழுக்க ஆர்வம் காட்டி வரும் சூழலில், பிரேமலதா விஜயகாந்த் தனது நிபந்தனைகளில் உறுதியாக இருந்து காய்களை நகர்த்தி வருகிறார்.

கூட்டணி குறித்துப் பேசுவதற்கு முன்பாகத் தொகுதிப் பங்கீட்டை உறுதி செய்ய வேண்டும் என்பதில் பிரேமலதா பிடிவாதமாக இருப்பதாகத் தெரிகிறது. ஒரு மாநிலங்களவை (Rajya Sabha) உறுப்பினர் பதவி மற்றும் இரட்டை இலக்க எண்ணிக்கையிலான தொகுதிகள் வேண்டும் என்பதே தேமுதிகவின் முக்கிய கோரிக்கையாக உள்ளது. அதிமுக தரப்பில் மாநிலங்களவை இடத்திற்கு உறுதி அளிக்கப்பட்டிருப்பதாகத் தகவல்கள் வெளியானாலும், தொகுதிகளின் எண்ணிக்கையில் இழுபறி நீடிக்கிறது. இதனால், முதலில் கூட்டணியை உறுதி செய்யுங்கள், பிறகு தொகுதிகளைப் பேசலாம் என்ற அதிமுகவின் அழுத்தத்திற்குப் பிரேமலதா இன்னும் பச்சைக்கொடி காட்டவில்லை.

மறுபுறம் திமுக தரப்பில் 8 தொகுதிகள் வரை ஒதுக்க முன்வந்திருப்பதாகக் கூறப்படும் வேளையில், கடந்த கால கசப்பான அனுபவங்களைக் கருத்தில் கொண்டு தேமுதிக நிதானம் காக்கிறது. 2019 மக்களவைத் தேர்தலின் போது ஏற்பட்ட குளறுபடிகள் மீண்டும் நடந்துவிடக் கூடாது என்பதில் அக்கட்சி கவனமாக இருக்கிறது. இரு பெரும் கட்சிகளும் பிரேமலதாவிற்கு அழுத்தம் கொடுத்து வரும் நிலையில், தொகுதிப் பங்கீடு அதிகாரப்பூர்வமாக முடிந்த பின்னரே கூட்டணி குறித்த இறுதி முடிவை அறிவிக்க அவர் திட்டமிட்டுள்ளார். இதனால் தமிழக தேர்தல் களம் தற்போது தேமுதிகவின் அடுத்த கட்ட நகர்வை நோக்கியே காத்திருக்கிறது.