“பணமோ, இலவச சிலிண்டரோ வேண்டாம்…” எங்களுக்கு தேவையானது இதுதான்… அரசு அள்ளிக்கொடுப்பதாக பொய் பிரச்சாரம் பண்றாங்க… இயக்குநர் ஆர்.கே.செல்வமணி ஆவேசம்…!!

தென்னிந்திய திரைப்பட பத்திரிகையாளர்கள் சங்கத்தின் புதிய நிர்வாகிகள் பதவியேற்பு விழாவில் கலந்து கொண்டு பேசிய பிரபல இயக்குநர் ஆர்.கே.செல்வமணி, திரைத்துறைக்கு அரசு அதிக சலுகைகளை அள்ளிக்கொடுப்பதாகப் பரப்பப்படும் தகவல்கள் அனைத்தும் முற்றிலும் உண்மைக்குப்புறம்பானவை எனத் தெரிவித்தார். கடந்த ஆண்டில் மட்டும் தமிழ் சினிமா மூலம் அரசிற்கு ரூ.3,000 கோடி வருவாய் கிடைத்துள்ளதாகவும், அதில் ஜிஎஸ்டி வரியாக மட்டுமே ரூ.540 கோடியைத் திரைப்படத்துறையினர் செலுத்தியுள்ளதாகவும் சுட்டிக்காட்டினார். இவ்வளவு பெரிய தொகையைப் பங்களிப்பாகக் கொடுக்கும்போது, சினிமா தொழிலாளர்களின் நலனுக்காக அரசு மிகச் சிறிய தொகையைக் கூட மறுபரிசீலனை செய்வதில்லை என்றும் வேதனை தெரிவித்தார்.

மேலும் தொடர்ந்த அவர், மக்களுக்கு ரூ.1,000, ரூ.2,000 என இலவசப் பணம் வழங்குவதோ அல்லது இலவசச் சமையல் எரிவாயு உருளைகள் தருவதோ தேவையற்றது என்றும், உழைத்து வாழக்கூடிய திறமை தமிழ்நாட்டு மக்களிடம் நிறைந்துள்ளது என்றும் கூறினார். எங்களுக்குத் தேவைப்படுவதெல்லாம் லஞ்சமும் ஊழலும் இல்லாத நேர்மையான நிர்வாகமும், பாதுகாப்பான சமூகச் சூழலுமே ஆகும். தனது மகள் நள்ளிரவு 12 மணிக்கு வெளியே சென்றுவிட்டு எவ்வித அச்சமுமின்றி பாதுகாப்பாக இல்லம் திரும்பும் சூழலை ஏற்படுத்தித் தந்தாலே போதுமானது என அவர் பேசிய கருத்துக்கள் தற்போது அரசியல் களத்தில் பெரும் விவாதத்தை ஏற்படுத்தியுள்ளன.