இஸ்லாமிய வாக்கு வங்கியில் பெரும் அதிர்வு…. 11 பூத்களில் நடந்த அந்த அதிசயம்… பின்னடைவில் திமுக, அதிமுக…. இடைத்தேர்தலில் தவெக செய்த அந்த ஒரு சம்பவம்….!

திருப்பூர் மாவட்டம் தாராபுரம் சட்டமன்ற இடைத்தேர்தலில் தவெக வேட்பாளர் பி. சத்யபாமா 9,471 வாக்குகள் வித்தியாசத்தில் வெற்றி பெற்றது தமிழக அரசியலில் பெரும் அதிர்வலைகளை ஏற்படுத்தியுள்ளது. ஒட்டுமொத்த தேர்தல் முடிவுகளைத் தாண்டி, இஸ்லாமியர்கள் செறிந்து வாழும் 11 வாக்குச்சாவடிகளில் பதிவாகியுள்ள வாக்கு மாற்றங்கள், மாநிலத்தின் பாரம்பரிய அரசியல் கணக்குகளைத் தலைகீழாக மாற்றி எழுதியுள்ளன. நீண்டகாலமாக திமுகவின் அசைக்க முடியாத கோட்டையாகக் கருதப்பட்ட இந்தச் சிறுபான்மையினர் வாக்கு வங்கியில், தவெகவின் அசுர வளர்ச்சி ஆழமான தாக்கத்தை ஏற்படுத்தியுள்ளது.

குறிப்பிட்ட அந்த 11 பூத்களின் கூட்டு முடிவுகள் வியக்கத்தக்க அரசியல் மாற்றங்களை வெளிப்படுத்தியுள்ளன. இத்தொகுதியின் குறிப்பிட்ட இந்தப் பகுதிகளில் மட்டும் தமிழக வெற்றிக் கழகம் ஒட்டுமொத்தமாக 691 புதிய வாக்குகளைக் கூடுதலாக ஈர்த்துள்ளது. குறிப்பாக, பூத் எண் 136, 138, 208, 209 மற்றும் 210 ஆகிய 5 வாக்குச்சாவடிகளில் திமுகவை பின்னுக்குத் தள்ளி தவெக முதலிடத்தைப் பிடித்து அசத்தியுள்ளது. இதன் மூலம் புதிய அரசியல் மாற்றாகவும், வலிமையான சக்தியாகவும் தவெக தனது இருப்பை அழுத்தமாகப் பதிவு செய்துள்ளது.

இந்தத் தேர்தல் களத்தில் பிரதான கட்சிகளான திமுக மற்றும் அதிமுக கடுமையான பின்னடைவைச் சந்தித்துள்ளன. இந்த 11 பூத்களில் மட்டும் திமுகவிற்கு ஒட்டுமொத்தமாக 642 வாக்குகளும், அதிமுகவிற்கு அதைவிடக் கூடுதலாக 788 வாக்குகளும் சரிந்துள்ளன. பல இடங்களில் திமுக இரண்டாம் இடத்திற்குத் தள்ளப்பட்டுள்ளதுடன், அதிமுகவின் வாக்கு வங்கி மிகப்பெரிய சரிவைச் சந்தித்துள்ளது. நாம் தமிழர் கட்சி சில பூத்களில் சிறிய அளவில் முன்னேறி நிகரமாக 49 கூடுதல் வாக்குகளைப் பெற்றிருந்தாலும், தவெகவின் எழுச்சியே இங்கு அனைவரின் கவனத்தையும் ஈர்த்துள்ளது.

பாரம்பரியமாகத் தங்களுக்கு ஆதரவாக இருந்து வந்த சிறுபான்மையினர் வாக்காளர்கள் மத்தியில் தவெக கால்பதித்திருப்பது திராவிடக் கட்சிகளுக்கு ஒரு எச்சரிக்கை மணியாக அமைந்துள்ளது. அதிமுகவின் படுதோல்வியும், திமுகவின் கணிசமான வாக்குச் சரிவும் தவெகவின் எழுச்சிக்கு வலுவான அடித்தளமாக மாறியுள்ளன. ஒட்டுமொத்த தமிழக அரசியலின் போக்கையே மாற்றவல்ல ஒரு புதிய மாற்று அரசியல் சக்தியாக தவெக உருவெடுத்து வருவதை தாராபுரம் இடைத்தேர்தல் புள்ளிவிவரங்கள் அப்பட்டமாக நிரூபித்துள்ளன.