“தாயை கொன்று சடலத்துடன் வாழ்ந்த மகள்”…. அதே வீட்டில் குழந்தைப் பெற்றெடுத்த கொடூரம்… ஓராண்டுக்குப் பின் வெளிவந்த திடுக்கிடும் உண்மை….!

ஹைதராபாத் அருகே காதலுக்கு இடையூறாக இருந்த தாயைக் கொன்று, வீட்டின் உள்ளேயே புதைத்துவிட்டு, ஓராண்டு காலம் அதே வீட்டில் மகள்கள் வாழ்ந்து வந்த அதிர்ச்சித் தகவல் வெளிச்சத்திற்கு வந்துள்ளது. ஜவஹர்நகர் பகுதியில் வசித்து வந்த அஞ்சு தாசரி ராமையா என்ற 40 வயது பெண்மணி, கடந்த 2025-ஆம் ஆண்டு மே மாதம் முதல் காணாமல் போனதாகக் கருதப்பட்டது. இது குறித்து அவரது மூத்த மகள் ரோஷினி குமாரி அளித்த புகாரின் அடிப்படையில் போலீஸார் விசாரணை மேற்கொண்டு வந்த நிலையில், நீண்ட தேடுதலுக்குப் பிறகு அஞ்சுவின் உடல் அவர் வாழ்ந்த வீட்டிலேயே கண்டெடுக்கப்பட்டது பெரும் பரபரப்பை ஏற்படுத்தியுள்ளது.

இந்தக் கொடூரக் கொலைக்குக் காரணமாக அஞ்சுவின் இளைய மகளுக்கும், மோண்டி குமார் சிங் என்பவருக்கும் இடையிலான முறையற்ற காதல் விவகாரம் இருந்துள்ளது. சிறுமியான இளைய மகளுடன் பழகியதற்காக மோண்டி குமார் மீது ஏற்கனவே போக்சோ (POCSO) சட்டத்தின் கீழ் வழக்குகள் பதிவு செய்யப்பட்டு அவர் சிறை சென்றிருந்தார். தனது காதலுக்கு அஞ்சு தொடர்ந்து முட்டுக்கட்டை போட்டு வந்ததாலும், ஜாதிப் பிரச்சனைகளை முன்னிறுத்தி எதிர்த்ததாலும், ஆத்திரமடைந்த காதலர்கள் இருவரும் அஞ்சுவைத் தீர்த்துக் கட்டத் திட்டமிட்டது போலீஸ் விசாரணையில் தெரியவந்துள்ளது.

கடந்த 2025, மே 12 அன்று சிறையிலிருந்து விடுதலையான மோண்டி, அஞ்சுவின் வீட்டிற்குள் மறைந்திருந்துள்ளார். அஞ்சு வீட்டிற்கு வந்தபோது, இளைய மகள் தனது தாயைப் பிடித்துக் கொள்ள, மோண்டி கத்தியால் அஞ்சுவின் மார்பில் குத்திக் கொலை செய்துள்ளார். அந்தச் சமயத்தில் மூத்த மகள் வேலைக்குச் சென்றிருந்ததால், அவர் வருவதற்குள் உடலைக் கட்டிலுக்கு அடியில் மறைத்து வைத்துள்ளனர். பின்னர், தனது தாய் யாரிடமோ தொலைபேசியில் பேசிவிட்டு எங்கோ சென்றுவிட்டதாகக் கூறி மூத்த மகளை இளைய மகள் நம்ப வைத்துள்ளார்.

கொலை செய்யப்பட்ட உடலை வெளியே கொண்டு செல்ல முடியாத சூழல் ஏற்பட்டதால், அவர்கள் வீட்டிற்குள்ளேயே குழி தோண்டி அஞ்சுவின் உடலைப் புதைத்துள்ளனர். உடல் அழுகி துர்நாற்றம் வீசாமல் இருக்க மணல் மற்றும் சிமெண்ட் கொண்டு அந்த இடத்தை மூடியுள்ளனர். தரை ஏன் சேதமடைந்துள்ளது என்று மூத்த மகள் கேட்டபோது, எலித் தொல்லை காரணமாகச் சரி செய்யப்பட்டுள்ளதாகக் கூறித் தப்பித்துள்ளனர். இதில் உச்சகட்ட அதிர்ச்சியாக, தனது தாயைப் புதைத்த அதே இடத்திற்கு மேல் கட்டில் போட்டு இளைய மகளும் அவரது சகோதரியும் ஓராண்டு காலம் வசித்து வந்துள்ளனர்.

இதற்கிடையில், அந்தச் சிறுமி கர்ப்பமானதைத் தொடர்ந்து, 2026 ஜனவரி மாதம் இருவரும் திருமணம் செய்து கொண்டுள்ளனர். சமீபத்தில் அந்தச் சிறுமிக்கு ஆண் குழந்தை ஒன்றும் பிறந்துள்ளது. இறுதியில், மோண்டி குமார் சிங் மீது சந்தேகம் கொண்ட காவல்துறையினர் அவரிடம் தீவிர விசாரணை நடத்தியபோது, அவர் உண்மையை ஒப்புக்கொண்டார். தற்பொழுது அஞ்சுவின் உடல் தோண்டி எடுக்கப்பட்டு பிரேதப் பரிசோதனை செய்யப்பட்டுள்ளது. காதலுக்காகப் பெற்ற தாயையே கொன்று வீட்டிற்குள் புதைத்த இந்தச் சம்பவம் தெலுங்கானா மாநிலத்தையே உலுக்கியுள்ளது.