” அச்சச்சோ… அதிர்ச்சி நடிப்பு… அம்பலமான கள்ளகாதல்… மாமியார் வீட்டில் 70 லட்சம் சுருட்டிய மருமகள்… 24 மணிநேரத்தில் ஸ்கெட்ச் போட்டு தூக்கிய போலீஸ்…!”

ஹாசன் கிராமப்புறக் காவல் துறையினர் 24 மணி நேரத்திற்குள் ஒரு பெரிய வீடுபுகுந்து திருடிய வழக்கை வெற்றிகரமாகக் கண்டுபிடித்துள்ளனர். ஹாசன் தாலுகாவில் உள்ள தொட்டஹொன்னேனஹள்ளி கிராமத்தைச் சேர்ந்த கேசவகவுடா என்பவரது வீட்டில் சனிக்கிழமை அன்று இச்சம்பவம் நடந்துள்ளது. கேசவகவுடா, அவரது மனைவி ஜெயலட்சுமி மற்றும் மகன் வேணுகோபால் ஆகியோர் விவசாய நிலத்திற்கு வேலைக்குச் சென்றிருந்த நேரத்தில், வீட்டில் தனியாக இருந்த மருமகள் அம்ருதா, தனது நண்பரான பரமேஷ் என்பவரை வீட்டிற்கு வரவழைத்து இத்திருட்டு சம்பவத்தை அரங்கேற்றியுள்ளார்.

இருவரும் சேர்ந்து வீட்டில் இருந்த அலமாரியை உடைத்து, சுமார் ரூ 56.16 லட்சம் மதிப்பிலான 441.5 கிராம் தங்க நகைகள் மற்றும் ரூ 13.40 லட்சம் ரொக்கப் பணத்தைக் கொள்ளையடித்துள்ளனர். திருடப்பட்ட பொருட்களை பரமேஷிடம் கொடுத்து அனுப்பிய அம்ருதா, யாருக்கும் சந்தேகம் வராதவாறு மாட்டுத்தொழுவத்தைப் பூட்டிவிட்டு முன் கதவைத் திறந்து வைத்துவிட்டு, வழக்கம் போல வயலுக்குச் சென்றுள்ளார். மாலையில் குடும்பத்தினர் வந்து பார்த்தபோது நகை, பணம் காணாமல் போனது தெரியவந்தது. அம்ருதா அதிர்ச்சியடைந்தது போல நடித்தபோதிலும், காவல்துறையினரின் முதற்கட்ட விசாரணையில் அவரது நடத்தையில் சந்தேகம் எழுந்தது.

தொடர்ந்து நடத்தப்பட்ட தீவிர விசாரணையில், கே.ஹிரேஹள்ளி கிராமத்தைச் சேர்ந்த அம்ருதா மற்றும் பரமேஷ் ஆகிய இருவரும் நீண்ட நாட்களாகப் பழகி வந்ததும், திட்டமிட்டு இந்தத் திருட்டை நடத்தியதும் அம்பலமானது. இதனையடுத்து, சம்பவ நடந்த ஒரே நாளில் இருவரையும் கைது செய்த ஹாசன் கிராமப்புறக் காவல்துறையினர், திருடப்பட்ட அனைத்துத் தங்க நகைகளையும் ரொக்கப் பணத்தையும் முழுமையாக மீட்டுள்ளனர். காவல்துறையினரின் இந்த விரைவான நடவடிக்கையைக் கண்ட அப்பகுதி மக்கள் அவர்களுக்குப் பாராட்டு தெரிவித்துள்ளனர்.