இனி தமிழ்நாட்டிற்கு காவிரி தண்ணீர் கிடைக்காது?… மேகதாது விவகாரத்தில் வெளிவந்த உண்மை…. நாடாளுமன்றத்தில் ஷாக் கொடுத்த மத்திய அரசு…!

மேகதாதுவில் கர்நாடக அரசு அணை கட்டுவதற்கு தமிழ்நாடு உள்ளிட்ட கீழ்மடை மாநிலங்களின் ஒப்புதல் தேவையில்லை என்று மத்திய அரசு நாடாளுமன்றத்தில் தெரிவித்துள்ள செய்தி, தமிழக விவசாயிகள் மற்றும் அரசியல் வட்டாரங்களில் கடும் அதிர்ச்சியையும் கொந்தளிப்பையும் ஏற்படுத்தியுள்ளது. காவிரி ஆற்றின் குறுக்கே மேகதாதுவில் புதிய அணை கட்டப்பட்டால், தமிழ்நாட்டிற்கு வர வேண்டிய நீரின் அளவு வெகுவாகக் குறைந்து விவசாயம் முற்றிலுமாகப் பாதிக்கப்படும் என்று தமிழக அரசு மற்றும் பல்வேறு அமைப்புகள் தொடர்ந்து கவலை தெரிவித்து எதிர்த்து வருகின்றன.

மாநிலங்களவையில் பாமக எம்பி அன்புமணி ராமதாஸ் எழுப்பிய கேள்விகளுக்கு மத்திய நீர்வளத்துறை இணையமைச்சர் ராஜ் பூஷன் சௌத்ரி எழுத்துப்பூர்வமாகப் பதிலளித்துள்ளார். அதில், 2018-ஆம் ஆண்டைய உச்ச நீதிமன்றத் தீர்ப்பில் கர்நாடகா அணை கட்டுவதற்குப் பிற மாநிலங்களின் அனுமதி பெற வேண்டும் என்று எங்கும் குறிப்பிடப்படவில்லை எனத் தெரிவித்துள்ளார். மேலும், காவிரி நடுவர் மன்றத்தின் இறுதித் தீர்ப்பின் பிரிவு XVIII-ஐச் சுட்டிக்காட்டி, தனது எல்லைக்குள் நீர்ப் பயன்பாட்டை முறைப்படுத்த ஒவ்வொரு மாநிலத்திற்கும் உரிமை உண்டு என்றும் விளக்கமளித்துள்ளார்.

கர்நாடகா அரசு சார்பில் 2019-இல் சமர்ப்பிக்கப்பட்ட மேகதாது திட்டத்தின் விரிவான திட்ட அறிக்கை (DPR), நடுவர் மன்றத்தின் தீர்ப்பு மற்றும் மத்திய நீர் ஆணையத்தின் வழிகாட்டுதல்களுக்கு ஏற்ப இல்லாததால் திருப்பி அனுப்பப்பட்டுள்ளதாக மத்திய அரசு கூறியுள்ளது. திருத்தப்பட்ட புதிய திட்ட அறிக்கையைச் சமர்ப்பிக்கும்படி கர்நாடக அதிகாரிகளுக்கு அறிவுறுத்தப்பட்டுள்ளதாகத் தெரிவிக்கப்பட்டுள்ள போதிலும், தமிழ்நாடு அரசின் ஒப்புதல் தேவையில்லை என்ற மத்திய அரசின் நிலைப்பாடு காவிரி நீர் உரிமையில் பெரும் சிக்கலை உருவாக்கியுள்ளது.

மத்திய அரசின் இந்த அறிவிப்பிற்குத் தமிழகத்தில் கடுமையான எதிர்ப்புகள் கிளம்பியுள்ளன. தமிழ்நாடு காங்கிரஸ் கமிட்டி தலைவர்களில் ஒருவரான மாணிக்கம் தாகூர் எக்ஸ் தளத்தில் பதிவிட்டுள்ள கருத்துப்படி, “மத்திய அமைச்சரின் இந்தப் பதில் மிகவும் ஆபத்தானது; முற்றிலும் ஏற்றுக்கொள்ள முடியாதது” எனச் சாடியுள்ளார். பாஜக அரசு தொடர்ந்து தமிழ்நாட்டிற்கும் விவசாயிகளுக்கும் எதிராகச் செயல்பட்டு வருவதாகக் குற்றம் சாட்டியுள்ள அவர், தமிழகத்தின் வாழ்வாதார உரிமைகளைக் காக்க நாடாளுமன்றத்திலும் மக்கள் மன்றத்திலும் காங்கிரஸ் கட்சி உறுதியாகக் குரல் எழுப்பும் என்று தெரிவித்துள்ளார்.