“உங்க கனவு கண்டிப்பா நடக்கும்…” ஆசையாக பேசி தலையில் துண்டை போட்ட தம்பதி… நீதிமன்றத்தின் அதிரடி தீர்ப்பு…!!

தூத்துக்குடி மாவட்டம் ஏரல் பகுதியைச் சேர்ந்த பாலமுருகன் மற்றும் அவரது மனைவி ஆகியோர், கடந்த 2024-ஆம் ஆண்டு அரசு வேலை வாங்கித் தருவதாகக் கூறி அப்பகுதியைச் சேர்ந்த இருவரிடம் ₹2.75 லட்சம் பணத்தைப் பெற்று மோசடி செய்துள்ளனர். இது குறித்து பாதிக்கப்பட்டவர்கள் அளித்த புகாரைத் தொடர்ந்து, மாவட்ட குற்றப்பிரிவு போலீசார் வழக்குப் பதிவு செய்து தீவிர விசாரணை நடத்தினர். இந்த வழக்கின் இறுதி அறிக்கையைத் தூத்துக்குடி நீதிமன்றத்தில் தாக்கல் செய்த நிலையில், குற்றச்சாட்டுகள் அனைத்தும் ஆதாரங்களுடன் நிரூபிக்கப்பட்டன.

இந்த வழக்கை விசாரித்த நீதிபதி பாக்கியராஜ், மோசடி செய்த தம்பதியினர் இருவரையும் குற்றவாளிகள் என உறுதி செய்து, தலா இரண்டு ஆண்டுகள் சிறைத் தண்டனையும் ₹4,000 அபராதமும் விதித்து அதிரடித் தீர்ப்பளித்தார். அரசு தரப்பில் சாட்சிகளைச் சரியாக ஆஜர்படுத்தி, குற்றவாளிகளுக்குத் தண்டனை பெற்றுத் தந்த காவல் துறையினரையும் அரசு வழக்கறிஞரையும் மாவட்ட காவல் கண்காணிப்பாளர் மதன் பாராட்டியுள்ளார். வேலை தேடும் இளைஞர்களை ஏமாற்றிப் பணம் பறிக்கும் கும்பல்களுக்கு இந்தத் தீர்ப்பு ஒரு எச்சரிக்கையாக அமைந்துள்ளது.