“இனி உங்களுக்கு இடமில்லை”….. திமுகவிலிருந்து வந்த 3 மாதத்தில் ஆப்பு…. நகர்மன்ற உறுப்பினரை தூக்கி எறிந்த தவெக தலைமை…. அதிர்ச்சியில் அமைச்சர்…..!

மயிலாடுதுறை மாவட்டம் தரங்கம்பாடியில் நடைபெற்ற ‘கடலோர பனை அரண்’ எனும் பனை விதை நடும் விழாவில், தமிழக வெற்றிக் கழக நிர்வாகிகளிடையே ஏற்பட்ட பகிரங்க உட்கட்சி மோதல் தமிழக அரசியல் வட்டாரத்தில் பெரும் பரபரப்பை ஏற்படுத்தியுள்ளது. தனியார் அறக்கட்டளை மற்றும் சேவைச் சங்கம் சார்பில் ஒரு கோடி பனை விதைகள் நடும் பெருந்திட்டத்தின் தொடக்க விழாவாக இது அமைந்திருந்தது. இயற்கையைப் பாதுகாக்கும் நோக்கில் ஏற்பாடு செய்யப்பட்ட இந்த நிகழ்வில், தவெகவைச் சேர்ந்த உள்ளூர் நிர்வாகிகளுக்கு இடையே நீண்டநாட்களாகப் புகைந்துகொண்டிருந்த உட்கட்சிப் பூசல் பொதுமேடையில் வெடித்து சிதறியது.

விழாவில் சிறப்பு விருந்தினராகக் கலந்துகொண்ட உணவுத்துறை அமைச்சர் வெங்கடரமணன் திட்டத்தைத் தொடங்கி வைத்துப் பேசிக்கொண்டிருந்தபோதே இந்த விரும்பத்தகாத சம்பவம் அரங்கேறியது. தவெக மாவட்டச் செயலாளர் தரப்பைச் சேர்ந்த தரங்கம்பாடி பேரூர்க்கழகச் செயலாளர் சதீஸ்குமாருக்கும், சமீபத்தில் திமுகவிலிருந்து விலகி தவெகவில் இணைந்த மயிலாடுதுறை நகர்மன்ற உறுப்பினர் மா.ரஜினியின் ஆதரவாளரான அன்புராஜ் என்பவருக்கும் இடையே திடீரெனக் கடுமையான வாக்குவாதம் எழுந்தது. இவ்வாக்ஃகுவாதம் கட்டுப்பாட்டை மீறி கைகலப்பாக மாறியதால், அங்கிருந்த பொதுமக்களும் கட்சியினரும் பெரும் அதிர்ச்சிக்கும் பதற்றத்திற்கும் உள்ளாகினர்.

பொதுமேடையில் நடந்த இந்த மோதலைக் கண்டு அதிர்ச்சியடைந்த அமைச்சர் வெங்கடரமணன், உடனடியாகத் தலையிட்டு இரு தரப்பினரையும் சமாதானப்படுத்தி சண்டையை முடிவுக்குக் கொண்டுவந்தார். தொடர்ந்து கூட்டத்தில் பேசிய அமைச்சர், கட்சி நிகழ்ச்சிகளிலும் பொதுவிடங்களிலும் இதுபோன்ற மோதல்களில் ஈடுபடுவது ஒட்டுமொத்த அரசுக்கும் முதலமைச்சருக்கும் அவப்பெயரையே ஏற்படுத்தும் என்று சுட்டிக்காட்டினார். எனவே, அனைவரும் கட்சிப் கட்டுப்பாட்டையும் ஒழுங்கையும் தவறாமல் பேணி, ஒற்றுமையுடன் செயல்பட வேண்டும் என்று இரு தரப்பினருக்கும் கடுமையான எச்சரிக்கையும் அறிவுரையும் வழங்கினார்.

அமைச்சரின் தலையீட்டிற்குப் பிறகு மேடையில் அமைதி திரும்பிய போதிலும், உட்கட்சி விதியை மீறியவர்கள் மீது ஒழுங்கு நடவடிக்கை பாயத் தொடங்கியது. அதன்படி, தவெக பொதுச்செயலாளர் ஆனந்த் அவர்களின் உத்தரவின் பேரில், மயிலாடுதுறை நகர்மன்ற உறுப்பினர் மா.ரஜினி கட்சியின் அடிப்படை உறுப்பினர் உள்ளிட்ட அனைத்துப் பொறுப்புகளில் இருந்தும் அதிரடியாக நீக்கப்பட்டார். இதுகுறித்து மாவட்டச் செயலாளர் கோபிநாத் வெளியிட்ட அறிக்கையில், கழகத்தின் கொள்கைகளுக்கும் கட்டுப்பாடுகளுக்கும் முரணாகத் தொடர்ச்சியாகச் செயல்பட்டதால் ரஜினி நீக்கப்பட்டுள்ளதாகவும், அவருடன் கட்சியினர் யாரும் எவ்விதத் தொடர்பும் வைத்துக்கொள்ளக் கூடாது என்றும் திட்டவட்டமாகத் தெரிவித்துள்ளார்.

மேலும், ரஜினி கட்சி நெறிமுறைகளைப் பின்பற்றாமல் தன்னிச்சையாக நலத்திட்ட உதவிகளை வழங்கி வந்ததும், அதுபோன்ற முக்கிய நிகழ்வுகளுக்கு மாவட்டச் செயலாளரையோ அல்லது பகுதி நிர்வாகிகளையோ முறையாக அழைக்காமல் புறக்கணித்து வந்ததுமே இந்த ஒழுங்கு நடவடிக்கைக்கு முதன்மைக்காரணம் எனக் கூறப்படுகிறது. திமுகவிலிருந்து விலகி பெருத்த எதிர்பார்ப்புகளுடன் தவெகவில் இணைந்த மா.ரஜினி, வெறும் மூன்று மாதங்களிலேயே கட்சியிலிருந்து நீக்கப்பட்டிருப்பது மயிலாடுதுறை அரசியலில் பெரும் விவாதத்தைக் கிளப்பியுள்ளது. தவெக தலைமை உட்கட்சி ஒழுங்கை நிலைநாட்ட இத்தகைய கடுமையான நடவடிக்கைகளை எடுத்து வந்தாலும், தொடக்க நிலையிலேயே அரங்கேறும் இதுபோன்ற மோதல்கள் தொண்டர்களிடையே சலசலப்பை ஏற்படுத்தியுள்ளன.