“நம்பவச்சி முதுகுல குத்திட்டாங்க.. ’பப்பு’ ராகுல்”…. சத்தமில்லாமல் விஜய் பக்கம் சாய்ந்த காங்கிரஸ்… செம கடுப்பில் ஸ்டாலின்…!

தமிழக சட்டப்பேரவைத் தேர்தல் முடிவுகள் வெளியாகி, எந்தக் கட்சிக்கும் அறுதிப் பெரும்பான்மை கிடைக்காத நிலையில், தமிழக அரசியல் களம் முன்னெப்போதும் இல்லாத வகையில் உச்சகட்ட பரபரப்பை எட்டியுள்ளது. 234 தொகுதிகளில் நடைபெற்ற இந்தத் தேர்தலில், முதன்முறையாக களமிறங்கிய நடிகர் விஜய்யின் தமிழக வெற்றிக் கழகம் (தவெக) 108 இடங்களைக் கைப்பற்றி தனிப்பெரும் கட்சியாக உருவெடுத்துள்ளது. இருப்பினும், ஆட்சி அமைக்கத் தேவையான 118 என்ற மந்திர எண்ணை எட்ட இன்னும் 10 இடங்கள் தேவைப்படுவதால், கூட்டணி மற்றும் இதர கட்சிகளின் ஆதரவை எதிர்நோக்கி விஜய் களம் இறங்கியுள்ளார்.

இந்தச் சூழலில், காங்கிரஸ் கட்சியின் மூத்த தலைவர் கே.சி. வேணுகோபால் டெல்லியில் அளித்த பேட்டி தமிழக அரசியலில் புயலைக் கிளப்பியுள்ளது. தவெக தலைவர் விஜய், ஆட்சி அமைக்கத் தங்களுக்கு ஆதரவு கோரியுள்ளதாக அவர் உறுதிப்படுத்தியுள்ளார். “மதச்சார்பற்ற அரசு அமைவதும், பாஜகவின் ஆதிக்கம் இல்லாத சூழலை உருவாக்குவதும் முக்கியம்; மக்களின் மனநிலையைப் பொறுத்து தமிழக காங்கிரஸ் உரிய முடிவை எடுக்கும்” என வேணுகோபால் தெரிவித்துள்ளார். இதன் மூலம் காங்கிரஸ் கட்சி விஜய்க்கு ஆதரவு அளிக்கத் தயாராக இருப்பதற்கான மறைமுக சமிக்ஞையை வெளிப்படுத்தியுள்ளது.

ஆனால், விஜய்க்கு ஆதரவு தரும் காங்கிரஸின் நகர்வுக்கு திமுக தரப்பில் இருந்து கடும் எதிர்ப்பு கிளம்பியுள்ளது. இது குறித்து அதிருப்தி தெரிவித்துள்ள திமுக செய்தித் தொடர்பாளர் சரவணன், “காங்கிரஸ் கட்சியினர் முதுகில் குத்துபவர்கள்” என்று மிகக் காட்டமாக விமர்சித்துள்ளார். “இந்தத் தேர்தலில் காங்கிரஸ் பெற்ற 5 இடங்களும் திமுகவால் தான் கிடைத்தது; ராகுல் காந்தியை பாஜகவினர் கேலி செய்தபோது அவரை பிரதமர் வேட்பாளராக முன்னிறுத்தியவர் முதல்வர் ஸ்டாலின் தான்” என்று குறிப்பிட்டு, கூட்டணி தர்மத்தை காங்கிரஸ் மீறுவதாகச் சாடியுள்ளார். இந்த மோதல் திமுக-காங்கிரஸ் உறவில் பெரும் விரிசலை ஏற்படுத்தியுள்ளது.

மற்றொரு புறம், அதிமுகவுடனும் தவெக ரகசியப் பேச்சுவார்த்தையில் ஈடுபட்டு வருவதாகத் தகவல்கள் கசிகின்றன. குறிப்பாக, லால்குடி அதிமுக எம்எல்ஏ லீமா ரோஸ், அதிமுக – தவெக இடையே சுமூகமான பேச்சுவார்த்தை நடைபெற்று வருவதாகவும் விரைவில் நல்ல முடிவு எட்டப்படும் என்றும் கூறியுள்ளது புதிய திருப்பத்தை ஏற்படுத்தியுள்ளது. காங்கிரஸ், இடதுசாரிகள், தேமுதிக அல்லது அதிமுக என யாருடைய ஆதரவுடன் விஜய் அரியணை ஏறுவார்? அல்லது அரசியல் முட்டுக்கட்டையினால் மறுதேர்தல் வருமா? என்பது இன்னும் சில நாட்களில் தெரிந்துவிடும்.