“இன்று இரவே க்ளைமாக்ஸ்!… “ராகுல் காந்தி கையில் காங்கிரஸ் வேட்பாளர் பட்டியல்” ஈரோடு மேடையில் ஸ்டாலின் கொடுத்த மாஸ் அப்டேட்”…!!

தமிழக சட்டசபை தேர்தல் வரும் ஏப்ரல் 23-ஆம் தேதி நடைபெற உள்ள நிலையில், திமுக தலைமையிலான கூட்டணியில் காங்கிரஸ் கட்சிக்கு ஒதுக்கப்பட்ட 28 தொகுதிகளுக்கான வேட்பாளர் பட்டியல் இன்னும் வெளியாகாமல் இழுபறி நீடித்து வருகிறது. வேட்புமனுத் தாக்கலுக்கு இன்னும் சில நாட்களே உள்ள நிலையில், காங்கிரஸ் வேட்பாளர்கள் அறிவிக்கப்படாததால் அந்தத் தொகுதிகளில் தேர்தல் பிரச்சாரம் தொடங்குவதில் தாமதம் ஏற்பட்டுள்ளது. இந்நிலையில், ஈரோடு கிழக்கு தொகுதிக்கான வேட்பாளரை ராகுல் காந்தி இன்று இரவுக்குள் அறிவிப்பார் என்று ஈரோட்டில் நடைபெற்ற தேர்தல் பரப்புரையில் முதல்வர் மு.க.ஸ்டாலின் தெரிவித்துள்ளார்.

ஈரோடு மாவட்டம் திண்டலில் நடைபெற்ற பொதுக்கூட்டத்தில் பேசிய முதல்வர் ஸ்டாலின், ஈரோடு மாவட்டத்தைச் சேர்ந்த 8 தொகுதிகளின் வேட்பாளர்களை ஆதரித்து வாக்கு சேகரித்தார். அப்போது, ஈரோடு கிழக்கு தொகுதி காங்கிரஸ் வேட்பாளருக்கு ‘கை’ சின்னத்தில் வாக்களிக்குமாறு மக்களிடம் கேட்டுக்கொண்டார். மேலும், திராவிட மாடல் அரசு என்பது வளர்ச்சியையும் மக்கள் நலனையும் அடிப்படையாகக் கொண்டது என்றும், மஞ்சள் ஆராய்ச்சி மையம் மற்றும் அத்திக்கடவு அவினாசி திட்டம் உள்ளிட்ட பல்வேறு திட்டங்களை ஈரோடு மாவட்டத்திற்காகத் தனது அரசு நிறைவேற்றியுள்ளதாகவும் அவர் பெருமிதத்துடன் குறிப்பிட்டார்.

பெண்கள் நலனுக்காகத் திமுக அரசு செயல்படுத்தி வரும் திட்டங்களைப் பட்டியலிட்ட முதல்வர், மகளிர் உரிமைத் தொகை, இலவசப் பேருந்து பயணம் மற்றும் புதுமைப் பெண் திட்டம் போன்றவற்றால் கோடிக்கணக்கான பெண்கள் பயனடைந்து வருவதைச் சுட்டிக்காட்டினார். தமிழகத்தில் சட்டம் ஒழுங்கு சிறப்பாக இருப்பதால் தான் இந்தியாவிலேயே அதிகப்படியான பெண்கள் இங்கு வேலைக்குச் செல்கிறார்கள் என்று அவர் கூறினார். அதேவேளையில், அதிமுக ஆட்சியில் பெண் காவல்துறை அதிகாரிக்கே பாதுகாப்பு இல்லாத சூழல் இருந்ததைச் சுட்டிக்காட்டி, எடப்பாடி பழனிசாமி தலைமையிலான முந்தைய ஆட்சியைப் ‘பொள்ளாச்சி சம்பவத்தை’ நினைவுகூர்ந்து கடுமையாக விமர்சித்தார்.

காங்கிரஸ் வேட்பாளர் தேர்வை இறுதி செய்ய டெல்லியில் இன்று இரவு 8 மணியளவில் அகில இந்தியக் காங்கிரஸ் கமிட்டியின் மத்திய தேர்தல் குழுக் கூட்டம் நடைபெற உள்ளது. கட்சியின் தேசியத் தலைவர் மல்லிகார்ஜுன கார்கே, ராகுல் காந்தி உள்ளிட்ட மூத்த நிர்வாகிகள் பங்கேற்கும் இந்த ஆலோசனைக் கூட்டத்தில் 28 தொகுதிகளுக்கான இறுதிப் பட்டியல் தயார் செய்யப்பட உள்ளது. வேட்புமனுத் தாக்கலுக்கு வரும் ஏப்ரல் 6-ஆம் தேதி கடைசி நாள் என்பதால், இன்று இரவே அதிகாரப்பூர்வ அறிவிப்பு வெளியாகும் என எதிர்பார்க்கப்படுகிறது.