பகீர்..! ஓடும் பேருந்திலிருந்து பெண்ணை அடித்து வெளியே தள்ளிய நடத்துநர்… கதறி அழுத பச்சிளம் குழந்தை… சில்லறை காசுக்காக அரங்கேறிய கொடூரம்!

மத்தியப் பிரதேச மாநிலம் குவாலியர் நோக்கிச் சென்ற பேருந்து ஒன்றில், சுனாரி கிராமத்தைச் சேர்ந்த பெண் பயணி ஒருவரிடம் நடத்துநர் (Conductor) மிக மோசமாக நடந்துகொண்ட சம்பவம் பெரும் பரபரப்பை ஏற்படுத்தியுள்ளது. பேருந்து கட்டணம் வசூலிப்பதில் ஏற்பட்ட தகராறில், அந்தப் பெண்ணை நடத்துநர் தகாத வார்த்தைகளால் திட்டி, உடல் ரீதியாகத் தாக்கியுள்ளார். ஒருகட்டத்தில் ஆத்திரமடைந்த நடத்துநர், ஓடிக்கொண்டிருந்த பேருந்திலிருந்து அந்தப் பெண்ணை வெளியே தூக்கி வீசியுள்ளார்.

இந்தக் கொடுமையான சம்பவத்தின்போது, அந்தப் பெண்ணின் பச்சிளம் குழந்தை தனது தாயைக் காப்பாற்ற முயன்று கதறி அழுத காட்சி காண்போரின் நெஞ்சைப் பதறவைத்துள்ளது. கூடுதல் கட்டணம் கேட்ட நடத்துநரின் செயலை அந்தப் பெண் எதிர்த்ததே இந்த மோதலுக்குக் காரணம் என்று கூறப்படுகிறது. இது தொடர்பான வீடியோ சமூக வலைதளங்களில் வெளியாகி வைரலாகி வருவதோடு, பொதுமக்களிடையே கடும் கொந்தளிப்பை ஏற்படுத்தியுள்ளது.

பெண்களின் பாதுகாப்பு கேள்விக்குறியாகியுள்ள இத்தகைய சம்பவங்கள் குறித்து சமூக ஆர்வலர்கள் கண்டனம் தெரிவித்து வருகின்றனர். பேருந்து நடத்துநரின் இந்த மனிதாபிமானமற்ற மற்றும் வன்முறைச் செயலுக்கு எதிராகக் கடுமையான நடவடிக்கை எடுக்கப்பட வேண்டும் எனப் பலரும் கோரிக்கை விடுத்து வருகின்றனர். காவல்துறை இது குறித்து தீவிர விசாரணை மேற்கொண்டு வருகிறது.