“நாங்கள் சாதித்துக் காட்டி விட்டோம்…. இனி கரப்பானுடன் மோத வேண்டாம்”…. அமைச்சர் ராஜினாமாவுக்கு பின் அபிஜீத் தீப்கே அளித்த அதிரடி பேட்டி….!

மத்திய கல்வி அமைச்சர் தர்மேந்திர பிரதான் தனது பதவியை ராஜிநாமா செய்துள்ள செய்தி, டெல்லி ஜந்தர் மந்தரில் கடந்த 35 நாட்களுக்கும் மேலாகப் போராடி வரும் மாணவர்களிடையே பெரும் உற்சாகத்தை ஏற்படுத்தியுள்ளது. நீட் வினாத்தாள் கசிவு மற்றும் தேர்வு முறைகேடு புகார்களுக்குப் பொறுப்பேற்று அவர் தனது ராஜிநாமா கடிதத்தை பிரதமருக்கு அனுப்பியதைத் தொடர்ந்து, போராட்டக் களத்தில் மாணவர்கள் இனிப்புகளுடனும் கொண்டாட்டங்களுடனும் தங்களது மகிழ்ச்சியை வெளிப்படுத்தினர். மாணவர் சமூகத்தின் இந்தத் தீவிரமான எழுச்சிக்கு மத்திய அரசு பணிந்துள்ளதை, ஜனநாயகத்திற்கு கிடைத்த இமாலய வெற்றியாகப் போராட்டக் குழுவினர் கருதுகின்றனர்.

உடல்நலக் குறைவால் அவதிப்பட்டு வரும் நிலையிலும் மேடையில் தோன்றிய ‘கரப்பான்பூச்சி ஜனதா கட்சி’ நிறுவனர் அபிஜீத் தீப்கே, மாணவர்களின் இந்த ஒருங்கிணைந்த போராட்டத்தை வெகுவாகப் பாராட்டினார். “யாருமே ராஜிநாமா செய்ய மாட்டார்கள் என்று கூறப்பட்ட ஆட்சியில், பயப்படாமல் உறுதியோடு நின்ற இளைஞர் சக்தியால் இது சாத்தியமாகியுள்ளது. உலகம் பணியும், அதைச் செய்ய வைக்கத் துணிவுள்ள ஆள் வேண்டும்; எனவே கரப்பான்பூச்சிகளிடம் யாரும் மோத வேண்டாம்,” என்று அவர் உணர்ச்சிப்பூர்வமாகப் பேசினார். அதிகாரத்தின் முன்பாகப் பணிய மறுக்கும் மாணவர் சக்தியே இந்த வீழ்ச்சிக்குக் காரணம் என்றும், இது ஜனநாயகத்தின் உண்மையான வெற்றி என்றும் அவர் சுட்டிக்காட்டினார்.

அமைச்சரின் ராஜிநாமா தங்களின் முதன்மை வெற்றியாக இருந்தாலும், போராட்டம் இத்துடன் முடிவடையாது என்று அபிஜீத் தீப்கே திட்டவட்டமாக அறிவித்துள்ளார். நீட் முறைகேட்டினால் உயிரை மாய்த்துக் கொண்ட மாணவர்களின் குடும்பங்களுக்குத் தலா 1 கோடி ரூபாய் இழப்பீடு வழங்குதல் மற்றும் கடந்த ஜூலை 20 அன்று அமைதிப் பேரணியில் மாணவர்கள் மீது தடியடி நடத்திய டெல்லி காவல்துறையினர் மீது கடுமையான நடவடிக்கை எடுத்தல் ஆகிய எஞ்சிய இரு கோரிக்கைகளும் நிறைவேறும் வரை ஜந்தர் மந்தரை விட்டு நகரப்போவதில்லை என அவர் தெளிவுபடுத்தியுள்ளார்.